Universal Robina က မလေးရှား ဘီစကွတ် brand ကို ကန်ဒေါ်လာ ၄၅၃ သန်းဖြင့် ဝယ်ယူ
ဖိလစ်ပိုင်မှ သွားရည်စာ လုပ်ငန်း Universal Robina က မလေးရှားမှ နာမည်ကြီး သွားရည်စာ brand ဖြစ်တဲ့
Munchy’s ကို မလေးရှားမှ ဘီစကွတ်ထုတ်လုပ်သူ Crunchy Foods ထံမှ ရင်းဂစ် ၁.၉၃ ဘီလျံ (အမေရိကန်ဒေါ်လာ ၄၅၃.၇ သန်း) ဖြင့် ဝယ်ယူလိုက်တာ ဖြစ်ပါတယ်။
Crunchy Foods ဟာ မလေးရှား မုန့်ဖုတ်လုပ်ငန်းကဏ္ဍမှာ ဦးဆောင်နေရာကို ရရှိထားပြီး Munchy's အပြင် Oat Krunch, Lexus, Muzic နဲ့ Choc-O တို့ကိုလည်း ပိုင်ဆိုင်ထားပါတယ်။ နိုင်ငံပေါင်း ၅၀ ကျော်မှာ ရောင်းချလျက် ရှိပါတယ်။
Munchy's ကို CVC Capital Partners က ၂၀၁၈ မှာ ဝယ်ယူခဲ့ပြီး ယခု Universal Robina က CVC Capital Partners ထံမှ ဝယ်ယူလိုက်တာ ဖြစ်ပါတယ်။
Munchy's ရဲ့ ကြွေးလက်ကန်နဲ့ ငွေလက်ကျန်တို့ကို CVC Capital Partners က တာဝန်ယူပိုင်ဆိုင်တဲ့ "cash-free, debt-free" ပုံစံဖြင့် အရောင်းအဝယ် ပြုခဲ့ကြတာ ဖြစ်ပါတယ်။
Universal Robina ရဲ့ စီအီးအို Irwin Lee က ကုမ္ပဏီအနေဖြင့် အရှေ့တောင်အာရှဈေးကွက်များထဲ ချဲ့ထွင်နေတာအတွက် Munchy's က အံကိုက်ပဲ လို့ မှတ်ချက်ပြုပါတယ်။
Universal Robina က မိသားစုပိုင် ကုမ္ပဏီစုကြီး JG Summit Holdings ရဲ့ လက်အောက်ခံ လုပ်ငန်းတစ်ခု ဖြစ်ပြီး Jack 'n Jill အားလူးပြားကြော်၊ Cream-O ကွပ်ကီး အပါအဝင် သွားရည်စာ အထုပ်အမျိုးမျိုးတို့ကို ထုတ်လုပ်ဖြန့်ဖြူးလျက် ရှိပါတယ်။