Fruits & Vegetables
နတ်မောက်မြို့နယ်တွင် ပဲတိုင်ထောင် (ခေါ်) တိုင်ထောင်ပဲသီးနှံကို စိုက်ပျိုးလျက်ရှိ
မကွေးတိုင်းဒေသကြီး၊ နတ်မောက်မြို့နယ် ကျေးရွာများမှ တောင်သူအချို့သည် ပဲတိုင်ထောင် (ခေါ်) တိုင်ထောင်ပဲသီးနှံကို စိုက်ပျိုးလျက်ရှိရာ ယခုအခါ စားသုံးသူဈေးကွက်တွင် အရောင်းသွက်လျက်ရှိကြောင်း သိရသည်။
ယခုဈေးကွက်တွင် တင်ပို့ရောင်းချနေသော ပဲတိုင်ထောင်သီးနှံကို သင်္ကြန်အပြီး ဧပြီ ၂၀ ရက်ကျော်ခန့်တွင် ရေသွင်းစိုက်ပျိုးခဲ့ကြောင်း၊ သီးနှံစိုက်ပြီး (၆၅)ရက်သားအရောက်တွင် ပဲတိုင်ထောင်များ ဆွတ်ခူး၍ ဈေးကွက်သို့တင်ပို့ခဲ့ရာ ပဲတိုင်ထောင် တစ်ပိဿာ (၁၅၀၀)ကျပ်နှုန်းအထိ ရောင်းချရပြီး ယခုအခါ တစ်ပိဿာ ၁၀၀၀ ကျပ်နှုန်းဖြင့် တွင်တွင်ကျယ်ကျယ် ရောင်းအားကောင်းနေကြောင်း စိုက်ပျိုးသူတောင်သူ ကပြောသည်။
“ကျွန်တော်တို့ကတော့ မီးဖိုချောင်သုံးသီးနှံဖြစ်တဲ့ ပဲတိုင်ထောင်ကို နှစ်စဉ်စိုက်ပျိုးတယ်၊ မျိုးစေ့တစ်ထုပ်ကို (၄၅၀၀)ကျပ် ပေးဝယ်ခဲ့ရတာပါ၊ အပင်ပေါက်နှုန်းလည်းကောင်းပါတယ်၊ မျိုးစေ့တစ်ထုပ်တွင် ပဲတိုင်ထောင်အစေ့အရေအတွက် (၅၀၀) လောက်ပါတယ်၊ မြေစနစ်တကျပြုပြင်၊ ဘောင်အသေးစားလုပ်၊ ပဲပင်တွေအပေါ်တက်နိုင်အောင် တိုင်ထောင်ပေးပြီး စိုက်ပျိုးထားတာပါ။ ယခု ကျွန်တော် တိုင်ထောင်ပဲ တစ်ထုပ်စိုက်ပျိုးထားတာ တစ်ကြိမ်ခူးဆွတ်ရင် ခြောက်ပိဿာကနေ ရှစ်ပိဿာအထိ ထွက်ပါပြီ၊ (၂)ရက်တစ်ကြိမ် ပဲတိုင်ထောင်ကို ခူးဆွတ်ရပါတယ်၊ (၄)ရက်လောက် မဆွတ်ပဲထားရင် အသီးပွကုန်တော့ စားသုံးသူတွေက မကြိုက်ကြဘူး” ဟုစိုက်ပျိုးသူတောင်သူက ပြောသည်။
နတ်မောက်မြို့နယ်တွင် ပုံမှန်အားဖြင့် မိုးနည်းသောဒေသဖြစ်သဖြင့် မိသားစုဝင်ငွေရရှိရေးအတွက် ယခင်စိုက်ပျိုးနေကြ ဆီထွက်သီးနှံများအပြင် ယခုကဲ့သို့ မီးဖိုချောင်သုံးသီးနှံများကိုပါ ပူးတွဲစိုက်ပျိုးလာကြသဖြင့် အထိုက်အလျောက် မိသားစုဝင်ငွေရရှိနေကြကြောင်း သိရသည်။
Source: mdn.gov.mm
