Myanmar
ဟင်းရွက်စုံသုပ် ခေါ် သနပ်သုပ်
ဒီကနေ့တင်ပြမည့်အကြောင်းကတော့ ရခိုင်မုန့်တီဆိုင်တွေမှာ
ရနိုင်တဲ့ ရခိုင်အစားအစာတစ်မျိုးဖြစ်တဲ့ ဟင်းရွက်စုံသုပ် ခေါ် သနပ်သုပ် အကြောင်းကို တင်ပြပေးလိုက်ပါတယ်။
လိုအပ်သည့်အမယ်များကတော့ ပဲလုံးရှည်သီး၊ ကန်စွန်းရွက်၊ ပဲပင်ပေါက်၊ ငှက်ပျောဖူး၊ ငရုတ်သီးအခြောက်၊ ငပိ၊ ကြက်သွန်နီ၊ ကြက်သွန်ဖြူ၊ ဆီ၊ နှမ်းမဲ၊ မကျည်းသီး၊ ပုစွန်ခြောက်မှုန့်၊ ဆီတို့ လိုအပ်ပါမယ်။
အရင်ဆုံး ပဲလုံးရှည်သီး၊ ကန်စွန်းရွက်၊ ပဲပင်ပေါက်နှင့် ငှက်ပျောဖူး ပြုတ်ပြီး ရေစင်အောင်ညှစ်ထားရပါမယ်။
ပြီးလျှင် ငရုတ်သီးအခြောက်ထောင်းထားတဲ့ အနှစ်နဲ့ ငပိအနည်းငယ်ကို ဆီချက်ပေးထားပါ။ ကြက်သွန်နီကို ကြွပ်နေအောင် ကြော်ထားပါ။ ပြီးနောက် ထပ်၍ ကြက်သွန်နီကို ပါးပါးလှီးထားပါ။
ပြုတ်ထားသော အရွက်ပြုတ်လေးတွေကို ပုစွန်ခြောက်မှုန့်၊ ကြက်သွန်နီပါးပါးလှီးထားတာထည့်၊ ငပိနဲ့ ငရုတ်သီးအနှစ် ဆီချက်ထားတာထည့်၊ ကြက်သွန်ဖြူ ဆီချက်လေးနည်းနည်းထည့်ပါ။
ပြီးနောက် ရောနယ်ပါ။ နှမ်းအမဲလှော်ထားတာလေးထည့်သုပ်ပါ။ နှမ်းမဲလေးလှော်ထားတဲ့ အနံ့လေးနဲ့က ပိုမွှေးပါတယ်။
နောက်ဆုံးတွင် မကျည်းနှစ်လေးထည့်၍ အပေါ့ အငန် မြည်းကြည့်ပါ။ ပြီးရင်တော့ ကြက်သွန်ကြော်လေးကို အပေါ်မှ ဖြူးပေးလိုက်ပါ။ ပြီးရင်တော့ အရသာရှိတဲ့ ဟင်းရွက်စုံသုပ်လေးကို ရပါပြီ။
