Myanmar

မြန်မာငွေဈေး ကျလို့ ပြောင်းဆံတွေ စျေးကွက်အတွင်း ဈေးအမြင့်ဆုံးဖြစ်ခဲ့ပြီး သုံးလအတွင်း ကုန်ကြမ်းပြတ်သွားနိုင်တယ်လို့ ပဲနှမ်းကုန်စည်ဒိုင်ကုန်သည်တွေက ပြောပါတယ်။

"ငွေဈေးကြောင့်ပဲ ဟိုဘက်က ဝယ်လိုအားကောင်းတာပေါ့။ အိတ်စပို့စ်ဆွဲအားက အခုလိုဆွဲမယ်ဆို တစ်လပိုင်းဆို ပြတ်သွားမယ်။ ထွက်နူန်းနဲ့ မမျှလို့ ပစ္စည်းပြတ်မြန်မှာ "လို့ ပြောင်းဆံတွေကို ပြည်ပတင်ပို့နေတဲ့ လက်ကားကုန်သည်တစ်ဦးက ပြောပါတယ်။

စီပီပြောင်း၊ ရှမ်းပြောင်း၊ ဗမာပြောင်း သုံးခုလုံးဟာ တစ်ပိသာ ကျပ် ၆၀၀ကျော်ကနေ စက်တင်ဘာ ၂၈ရက်က ငွေဈေးနူန်းမြင့်တက်လို့ ပြောင်းဈေးတွေ ကျပ် ၇၇၀ ထိရောက်ရှိခဲ့ပါတယ်။ နောက်ရက်တွေမှာ ငွေဈေးအနည်းငယ်ကျဆင်းပေမဲ့ တစ်ပိသာ ကျပ် ၇၀၀ အောက်မရောက်ခဲ့ပါဘူး။

၂၀၂၀ ခုနှစ် အောက်တိုဘာလတုန်းက ပြောင်းဈေးနူန်ူးတွေဟာ တစ်ပိသာကို ကျပ် ၄၅၀ ထိသာ ဈေးရခဲ့တာဖြစ်ပါတယ်။

မန္တလေး ပဲနှမ်းကုန်စည်ဒိုင် ဒါမှမဟုတ် ပြောင်းထွက်ရှိရာ ဒေသကနေ နေ့စဉ်ပြောင်း တန်ချိန်ပေါင်း ၁၂၀၀ ကျော်ကို တင်ပို့ပေးရတာဖြစ်တယ်လို့ ပွဲစားကုန်သည်စက်ပိုင်များ မဟာကထိန်တော် အသင်း ပဲနှမ်းကုန်စည်ဒိုင် ကနေ သိရပါတယ်။

" တောက်လျှောက်ဝယ်နေမှာ။ တက်တာ ကျတာက ငွေပေါ်ပဲ မူတည်နေမှာ။ အခုရက်ပိုင်းများတယ်။ တစ်ရက်ကို တွဲကား အစီး သုံး၊ လေးဆယ်ဆိုတာ အောက်ထစ်ပေါ့။ ပြောင်းဈေးအနေနဲ့ ဒေါ်လာဈေးမပြောင်းပေမဲ့ ငွေဈေးအတက်အကျနဲ့ အရောင်းဝယ်ဖြစ်တယ်"လို့ ပွဲစားကုန်သည်စက်ပိုင်များ မဟာကထိန်တော် အသင်း ပဲနှမ်းကုန်စည်ဒိုင် က တာဝန်ရှိသူတစ်ဦးက ပြောပါတယ်။

ပြောင်းဆံတွေကို လက်ရှိမှာ ရေကြောင်းနဲ့ ကုန်တင်ယာဉ်တွေ အသုံးပြုပြီး ရန်ကုန်က တဆင့် အိန္ဒိယ၊ လစ်ပိုင်၊ ဗီယက်နမ် တို့ကို တင်ပို့ပေးရတာဖြစ်ပါတယ်။

လက်ရှိမှာ ရှမ်း၊ ကယားပြည်နယ်နဲ့ ရွှေဘိုဘက်က ပြောင်းဆံတွေ ဈေးကွက်ထဲကို အဝင်ရှိနေတာဖြစ်ပြီး မန္တလေး ပဲနှမ်း ကုန်စည်ဒိုင်ကနေ မတ်ပဲ၊ ပဲတီစိမ်း၊ ပဲစင်းငုံ၊ မြေပဲ၊ နှမ်းနဲ့ ပြောင်းဆံတွေကို ပြည်ပ အိတ်စပိုစ် ပို့ကုန်အဖြစ် တင်ပို့ပေးနေရတာ ဖြစ်ပါတယ်။

BBC