Fruits & Vegetables

စစ်ကိုင်းတိုင်းဒေသကြီး၊ မုံရွာမြို့နယ်ထဲက ကျွဲရဲ၊ တောင်ပုလူ၊ ရှင်ငါးဆယ်၊ ကျောက်စစ်ပုံ၊ ခိုးသန်း၊ ကော်လပြတ်၊ သမန္တာ၊ ပလ္လင်ကုန်း၊ စတဲ့ကျေးရွာတွေမှာ ကြက်သွန်သီးနှံတမျိုးတည်းကိုသာ အဓိကစိုက်ပျိုးကြတာဖြစ်ပါတယ်။

လက်ရှိမှာ ကြက်သွန်တပိဿာကို (၂၃၀) ကျပ်ဝန်းကျင်အထိဈေးကျဆင်းနေပြီး ဝယ်ယူသူမရှိတဲ့အနေအထားမျိုးတောင်ကြုံတွေ့နေရတဲ့အတွက် ကြက်သွန်စိုက် တောင်သူတွေ အခက်တွေ့နေကြရပါတယ်။

အရင်နှစ်တွေက ကြက်သွန်ကို ပြည်ပဈေးကွက်တွေဖြစ်တဲ့ တရုတ်၊ ထိုင်း၊ ဘင်္ဂလားဒေ့ရှ်၊ အိန္ဒိယနိုင်ငံတွေအထိ တင်ပို့ရောင်းချနေရပြီး အခုနှစ်မှာတော့ ပြည်တွင်းနိုင်ငံရေးအခြေအနေနဲ့ covid တတိယလှိုင်းကြောင့် ပြည်ပကို တင်ပို့နေတဲ့ ကြက်သွန်ဈးကွက်တွေ ပိတ်လိုက်တဲ့အတွက် အခုလိုဈေး ကျလာဖြစ်တယ်လို့ ကြက်သွန်ပွဲရုံပိုင်ရှင်တဦးကပြောပါတယ်။

အခုလက်ရှိပေါက်ဈေးရှိနေတဲ့ တပိဿာ (၂၃၀) ကျပ်ဝန်းကျင်ဈေးနှုန်းဟာ ပြည်တွင်းလက်လီဈေးကွက်သာဖြစ်ပြီး အရင်နှစ်တွေနဲ့နှိုင်းယှဉ်မယ်ဆိုရင် ၂၀ ရာခိုင်နှုန်းသာ အရောင်းအဝယ်ရှိနေတယ်လို့လည်း ဆိုပါတယ်။

တောင်သူတွေအနေနဲ့ ကြက်သွန်စိုက်ပျိုးတဲ့နေရာမှာ စိုက်ပျိုးစရိတ်အနေနဲ့ တစ်ဧကကို ကျပ် (၁၃) သိန်းဝန်းကျင်အထိ ကုန်ကျပြီး မြေအငှားနဲ့စိုက်တဲ့တောင်သူတွေမှာ (၁၈) သိန်းဝန်းကျင်အထိကုန်ကျစရိတ်ရှိပါတယ်။ ကြက်သွန်စပေါ်တဲ့အချိန်မှာလည်း ကြက်သွန်ဈေးဟာ တပိဿာကို (၂၀၀) ကျပ်ဝန်းကျင်သာရှိနေတဲ့အတွက် တောင်သူတွေမှာ မရောင်းဘဲ သိုလှောင်ထားပြီး အခုအချိန်မှာလည်း ဈေးက ဆက်ကျနေတာကြောင့် ဈေးကွက်ပါပျက်နေတဲ့အတွက် အခက်အခဲတွေကြုံတွေ့နေကြတာဖြစ်တယ်လို့ပြောပါတယ်။

ဒါ့အပြင် တချို့ကိုယ်ပိုင်အရင်းအနှီးမရှိတဲ့တောင်သူတွေမှာ စိုက်ပျိုးစရိတ်အတွက်အတိုးနဲ့ ငွေချေးငှားယူပြီး စိုက်ပျိုးရတာဖြစ်လို့ ချေးငွေတွေလည်း ပြန်ဆပ်ဖို့ လိုအပ်နေပြီး ဖော်ထားတဲ့ ကြက်သွန်တွေကလည်း တော်သလင်းလအထိသာ အထားခံတော့မှာဖြစ်တယ်လို့တောင်သူတွေကဆိုပါတယ်။ လှောင်ထားတဲ့ကြက်သွန်တွေသာ တော်သလင်းလရောက်တဲ့အထိအထိ ရောင်းမထွက်ခဲ့ရင် အားလုံး ပျက်စီးကုန်တော့မှာဖြစ်သလို အကြွးရှင်တွေကိုလည်း ယာမြေတွေရောင်းပြီး အကြွေးထိုးဆပ်ရမယ့်အခြေအနေတွေကြုံတွေ့ရတော့မယ်လို့ ဆိုပါတယ်။

ဘီဘီစီ