Myanmar

ဆန်၊ ဆန်ကွဲ၊ ပဲမျိုးစုံနှင့် ပြောင်းတင်ပို့၍ ရရှိသော ပို့ကုန်ရငွေဖြင့် စက်သုံးဆီ တင်သွင်းခြင်း လုပ်ငန်းစဉ်များနှင့်စပ်လျဉ်း၍ သိသင့်သည့်အချက်များ

To Get Instant Update

https://t.me/Guid4U
JOIN THE CHANNEL 

၁။  ဆန်၊ဆန်ကွဲ၊ပဲမျိုးစုံနှင့် ပြောင်းတင်ပို့၍ ရရှိသော ပို့ကုန်ရငွေဖြင့် စက်သုံးဆီ တင်သွင်းခြင်းတွင် လုပ်ဆောင်ရမည့် လုပ်ငန်းစဉ်များကို  လုပ်ငန်းရှင်များအနေဖြင့်  သိရှိနိုင်ရန် အသိပေးအပ်ပါသည်။ 

၂။ မြန်မာနိုင်ငံတော်ဗဟိုဘဏ်က အကောက်ခွန်ဦးစီးဌာနမှ ပေးပို့လာသော ဆန်၊ ဆန်ကွဲ၊ ပဲမျိုးစုံ နှင့်ပြောင်း တင်ပို့သည့် ကုမ္ပဏီတစ်ခုချင်း၏ ပို့ကုန်ကြေညာလွှာ (Export Declaration) စာရင်းများကို သက်ဆိုင်ရာ AD လိုင်စင်ရဘဏ်များသို့ ပေးပို့သွားမည်ဖြစ်သည်။

၃။ ကုန်စည်တင်ပို့သူသည် ကုမ္ပဏီ၏ ပို့ကုန်ကြေညာလွှာ (Export Declaration) အရ သတ်မှတ်ရက်အတွင်း ဝင်ရောက်လာသည့် ပို့ကုန်ရငွေ၏ ၃၀% အနက်မှ ၃၅ % ကို မြန်မာနိုင်ငံတော် ဗဟိုဘဏ်၏ ရည်ညွှန်းငွေလဲလှယ်နှုန်းဖြင့် AD လိုင်စင်ရဘဏ်များက မြန်မာကျပ်ငွေဖြင့် တစ်ရက် အတွင်းလဲလှယ်ပေးမည်ဖြစ်ပြီး၊ ၆၅% အား နိုင်ငံခြားငွေကြေးဈေးကွက် (Online Trading Platform) တွင် ဖြစ်ပေါ်နေသော ဈေးကွက်ပေါက်ဈေးဖြင့် AD လိုင်စင်ရဘဏ်များတွင် ရောင်းချရမည်ဖြစ်သည်။ ကျန်ပို့ကုန်ရငွေ ၇၀% ကို သွင်းကုန်(စက်သုံးဆီ)တင်သွင်းခြင်းအတွက် ပြည်ပသို့ ပေးချေရန် ကုမ္ပဏီ၏ နိုင်ငံခြားငွေစာရင်းတွင် ထည့်သွင်းထားရှိပေးမည်။ 

၄။  ကုမ္ပဏီမှကိုယ်တိုင် စက်သုံးဆီ တင်သွင်းခြင်းဖြစ်ပါက သွင်းကုန်အတွက်ပေးချေရာတွင် ကုမ္ပဏီ၏ နိုင်ငံခြားငွေစာရင်းရှိ အဆိုပါ ပို့ကုန်ရငွေ ၇၀ % မှ ပေးချေရန်ဖြစ်ပြီး စက်သုံးဆီတင်သွင်းသော ကုမ္ပဏီသို့  နိုင်ငံခြားငွေ (ဆန်၊ ဆန်ကွဲ၊ ပဲမျိုးစုံနှင့် ပြောင်း တင်ပို့ခြင်းမှ ရရှိထားသော ပို့ကုန်ရငွေ ၇၀%) အားရောင်းချမည်ဆိုပါက  သက်ဆိုင်ရာ AD လိုင်စင်ရ ဘဏ်များမှ Online Trading Platform တွင် တင်ပြ၍ အရောင်းအဝယ်ဆောင်ရွက်ရမည် ဖြစ်ပြီး ရောင်းချသူ၏ နိုင်ငံခြားငွေစာရင်းမှ ဝယ်ယူသူ၏ နိုင်ငံခြားငွေစာရင်းသို့လွှဲပြောင်းပေးရန်နှင့် မတူညီသောဘဏ်များ အကြား လွှဲပြောင်းခြင်း ကိုလည်း ဆောင်ရွက်နိုင်ပါသည်။

၅။ စက်သုံးဆီတင်သွင်းမည့်ကုမ္ပဏီမှ လိုင်စင်လျှောက်ထားရာတွင် ဆန်၊ ဆန်ကွဲ၊ ပဲမျိုးစုံနှင့်ပြောင်း တင်ပို့ရာမှ ပို့ကုန်ရငွေရရှိထားကြောင်း (သို့မဟုတ်) ဆန်၊ဆန်ကွဲ၊ ပဲမျိုးစုံနှင့်ပြောင်း တင်ပို့သည့် ကုမ္ပဏီမှ ပို့ကုန်ရငွေအား ဝယ်ယူထားကြောင်း အထောက်အထားအဖြစ် AD လိုင်စင်ရဘဏ်များမှ ထုတ်ပေးသည့် Credit Advice နှင့် Bank Statement မူရင်းအား တင်ပြရမည်ဖြစ်ပါသည်။ 

ကုန်သည်စက်မှုအသင်းချုပ် (UMFCCI)

၂၀၂၃ခုနှစ် ၊ ဒီဇင်ဘာလ ၂၁ ရက်

To Get Instant Update
https://t.me/Guid4U
JOIN THE CHANNEL