Food & Livestock
ကြက်သွန်ပျိုးခင်းတွေမှာ ညစောင့်အိပ်နေရ
google.com
မန္တလေးတိုင်းဒေသကြီး မုံရွာမြို့နယ်ဘက်မှာ နွေကြက်သွန် စိုက်ပျိုးဖို့မျိုးစေ့ဈေးတွေ အဆမတန်ကြီးနေတဲ့အတွက် ကြက်သွန်ပျိုးခင်းတွေမှာ ပျိုးပင်ခိုးယူခံရမှုတွေနဲ့ ကြုံတွေ့နေကြရတယ်လို့ ကြက်သွန်စိုက်တောင်သူဆီက သိရပါတယ်။
မုံရွာဘက်တွေမှာ အဲဒီလိုညတွေမှာ အခိုးခံကြရတယ်လို့ ပြောကြတယ်။ သူတို့ က အစ်မတို့ဘက်ကို ဒီနှစ်လာဝယ်ကြရတယ်၊ ခိုးကြတာက ပြန်ရောင်းဖို့အတွက်တော့ မဟုတ်ဘူး၊ ပြန်စိုက်ဖို့ပါ။
သူတို့ ဘက်မှာ မျိုးစေ့ဈေးက တစ်ပြည်ကို တစ်သိန်းလောက်ရှိနေတာလေ၊ ကျန်တဲ့ဘက်တော့ ၇၀,ဝ၀ဝ လောက်ပဲရှိတယ်လို့ မလှိုင်မြို့နယ် ရွာသစ်ရွာမှ ဒေါ်ဇော်က ပြောပါတယ်။
လက်ရှိ မုံရွာမှာ မျိုးစေ့တစ်ပြည်ကို ကျပ်တစ်သိန်းအထိရှိပြီး ကြက်သွန်ပျိုးပင် စိုက်ထားပြီးသား တစ်ဧကကိုကျပ်သုံးသိန်းအထိရှိပါတယ်။
တစ်ဧကကို ကြက်သွန်မျိုးစေ့ သုံးပြည်အထိပျိုးထောင်ရတယ်လို့ သိရပါတယ်။မုံရွာမြို့နယ်ဘက်မှာ ကြက်သွန်နီအများဆုံးစိုက်ကြတဲ့ ကျေးရွာတွေကတော့ မင်းကုန်း၊ မုဆိုးကုန်းနဲ့ ကျွဲရဲရွာတို့ ဖြစ်ပြီး လက်ရှိမှာကြက်သွန်ပျိုးခင်းပိုင်ရှင်တွေအနေနဲ့ ပျိုးပင်ခိုးယူခံရမှုတွေ ဖြစ်နေတဲ့အတွက် ညပါအိပ်စောင့်နေကြရတယ်လို့ သိရပါတယ်။
ပြီးခဲ့တဲ့နှစ်ကတော့ မျိုးဈေးကလဲ တစ်ပြည်ကို ၂၀,ဝ၀ဝလောက်ပဲရှိတော့ ပျိုးပင် ဧကပြတ်ဈေးလဲချိုတယ်၊ ဒီနှစ်တော့ မျိုးဈေးကတော်တော် လေးမြင့်နေတော့ခိုးကြတာပေါ့။ ဦးတို့ဘက်မှာတော့ ယခင်နှစ်တွေက ကိုယ့်စိုက်ခင်းမှာ ပျိုးပင်မလောက်လို့ အခိုးခံရတာတွေတော့ရှိတယ်၊ ဒီဘက်နှစ်တွေတော့ ဦးတို့ဆီမှာ အဲဒီလိုတွေမရှိတော့ပါဘူးလို့ ပျော်ဘွယ်မြို့နယ်မှ ကြက်သွန်စိုက်တောင်သူ ဦးအေးဆွေက ပြောပါတယ်။
ကြက်သွန်မျိုးစေ့တွေ ဈေးမြင့်နေတာဟာ ပြီးခဲ့တဲ့ မိုးကြက်သွန်တုန်းက ရေကြီးရေလျှံမှုတွေဖြစ်ခဲ့ပြီး အထွက်နှုန်းလျော့ကျခဲ့တာကြောင့်ဖြစ်ပါတယ်။
အခုအချိန်မှာတော့ တောင်သူတွေအနေနဲ့ နွေကြက်သွန်စိုက်ပျိုးဖို့အတွက် ပျိုးပင်တွေ စထောင်နေကြပြီဖြစ်ပါတယ်။
Source: Kumudra
