Myanmar
ထောပတ်သီး ယူကေ ပို့မယ့်အစီအစဥ်ပျက်
ယူကေက တစ်လ ကိုထောပတ်သီး ကီလိုဂရမ် နှစ်သိန်း မြန်မာနိုင်ငံထံက ဝယ်ယူဖို့ ကမ်းလှမ်းပေမယ့် မြန်မာနိုင်ငံထောပတ်သီးတင်ပို့ရောင်းချသူများအသင်း အနေနဲ့မပို့ဖြစ်တော့ဘူးလို့ သိရပါတယ်။
ယူကေဝယ်ဖို့ကမ်းလှမ်းတဲ့ ထောပတ်သီး အမျိုးအစားဟာ HASS (ဟက်စ်) အမျိုးအစားဖြစ်ပြီး ပြည်ပဈေးကွက်ပေါက် အမျိုးစားဖြစ်ပါတယ်။
ယူကေကိုမပို့ဖြစ်တဲ့ အကြောင်းရင်းထဲမှာ ကွန်တိန်နာနဲ့ ဘဏ်စနစ်အခက်အခဲဖြစ်တာတွေအပြင် အခြားအချက်တွေကြောင့် မပို့ဖြစ်တာလို့လည်း ဆိုပါတယ်။
ယူကေကို တင်ပို့ဖို့ ကွန်တိန်နာ ရှားပါးတာ၊ ကွန်တိန်နာ ငှားခတွေ စျေးကြီးတာလည်း ပါဝင်ကြောင်း ၊ တောင်သူတွေက ငွေကြေးကြန့်ကြာမှုတွေအပေါ် စိုးရိမ်မှုလည်း ပါကြောင်း ဒါ့အပြင် စိုက်ပျိုးရာမှာ အသုံးပြုတဲ့ သွင်းအားစုတွေ စျေးမြင့်လာတာတဲ့ အတွက် အရည်အသွေးပိုင်းကို စိုးရိမ်မှုတွေရှိပြီး ထောပတ်သီးတင်ပို့ရာမှာ အချိန်ကြန့်ကြာမှုကြောင့် အသီးတွေ အလေအလွင့် ဖြစ်လာနိုင်တဲ့အခြေအနေတွေကိုပါ ထည့်သွင်းစဥ်းစားခဲ့ရတယ်လို့ မြန်မာနိုင်ငံ ထောပတ်သီး တင်ပို့ရောင်းချသူများအသင်း အတွင်းရေးမှူး ဦးကျော်စိုးမင်းက ပြောပါတယ်။
ယူကေ အစား စင်္ကာပူနဲ့ ဒူဘိုင်းဘက်ကို တင်ပို့ဖို့ရှိပြီးတော့ ငွေသွင်းငွေထုတ် နဲ့ အခြားစျေးကွက်ကိစ္စတွေကို အဆင်ပြေအောင်ညှိနိုင်းနေတယ်လို့လည်း သူကပြောပါတယ်။
BBC