Fruits & Vegetables
မြန်မာ့ကော်ဖီလုပ်ငန်း ပိုမို တိုးချဲ့နိုင်ရေးအတွက် ကော်ဖီဧက (၃) သိန်းထိ စိုက်ပျိုးရန် စီစဉ်
မြန်မာ့ကော်ဖီ စိုက်ပျိုးရေးကဏ္ဍ ပိုမို ဖွံ့ဖြိုး တိုးတက်လာစေရေးအတွက် ကော်ဖီဇုန် သုံးဇုန်ခွဲ၍ ကော်ဖီစိုက်ဧက သုံးသိန်းထိ စိုက်ပျိုးသွားရန် စီစဉ်နေကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန သတင်းများအရ သိရသည်။
မြန်မာနိုင်ငံသည် ကမ္ဘာ့ကော်ဖီ စိုက်ပျိုးထုတ်လုပ် တင်ပို့ရောင်းချနေသည့် နိုင်ငံပေါင်း (၇၅) နိုင်ငံတွင် ပါဝင်ပြီး နိုင်ငံတကာ ကော်ဖီဈေးကွက်တွင် အနံ့အရသာနှင့် အရည်အသွေးပိုင်း၌ မြန်မာနိုင်ငံမှ စိုက်ပျိုး ထွက်ရှိနေသည့် ကော်ဖီများသည် ကမ္ဘာ့ထိပ်တန်းအဆင့်သို့ ရောက်ရှိနေပြီ ဖြစ်သည်။
သို့သော် လက်ရှိတွင် မြန်မာနိုင်ငံ၌ ကော်ဖီစိုက်ပျိုးဧက (၄၉,၀၀၀) ကျော်သာ ရှိပြီး အဆိုပါ ကော်ဖီ စိုက်ပျိုးဧကမှာ မြန်မာနိုင်ငံမှ ကော်ဖီစိုက်ပျိုးနိုင်သည့် မြေဧရိယာ၏ (၆၀) ရာခိုင်နှုန်းခန့်သာ ရှိနေကြောင်း သိရှိရသည်။
ထို့ကြောင့် မြန်မာ့ကော်ဖီ စိုက်ပျိုးရေးလုပ်ငန်းများ ပိုမို ဖွံ့ဖြိုး တိုးတက်လာစေရန်နှင့် ပိုမို တိုးချဲ့ စိုက်ပျိုးနိုင်ရန်အတွက် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန စိုက်ပျိုးရေးဦးစီးဌာနက ကော်ဖီလုပ်ငန်း လုပ်ကိုင်လိုသူများကို ဖိတ်ခေါ်ကာ အစီအစဉ်များ ရေးဆွဲ ဆောင်ရွက်လျက် ရှိကြောင်း သိရသည်။
Click Here > Mega Global Green
ထို့အတူ ကော်ဖီလုပ်ငန်းများအပေါ် ဝန်ဆောင်မှုပေးမည့် အခြေအနေများ၊ ကော်ဖီစိုက်ပျိုးထုတ်လုပ်မှု၊ အခြောက်ခံလုပ်ဆောင်မှု၊ ကုန်ချောထုတ်လုပ်မှု၊ စက်ကိရိယာအသုံးချမှု စသည့် လုပ်ငန်းစဉ်တစ်လျှောက် ကော်ဖီလုပ်ငန်း နည်းပညာဆိုင်ရာ မွမ်းမံသင်တန်းများလည်း ဆောင်ရွက်ပေးသွားမည်ဟု ဆိုသည်။
ဒေသတွင်း နာမည်ကျော်မည့် ကော်ဖီအမှတ်တံဆိပ်မျိုး ဖြစ်လာစေရေး ပျိုးထောင်မှုများကိုလည်း ဆောင်ရွက်ပေးရန် စီစဉ်ထားကြောင်း သိရသည်။
လက်ရှိ မြန်မာနိုင်ငံတွင် ကော်ဖီစိုက်ပျိုးရေးလုပ်ငန်းများကို ရှမ်းပြည်နယ်တွင် ဧက ၂၇,၀၀၀ ဖြင့် ပထမအများဆုံး၊ ကရင်ပြည်နယ်တွင် ၁၀,၀၂၉ ဧကဖြင့် ဒုတိယအများဆုံးနှင့် မန္တလေးတိုင်းဒေသကြီးတွင် ဧက ၅,၀၀၀ ကျော်ဖြင့် တတိယအများဆုံး စိုက်ပျိုးလျက် ရှိကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ထုတ်ပြန်ထားသည်။
Source: ရတနာပုံသတင်းစာ
