Fruits & Vegetables
မြန်မာနိုင်ငံမှ ကြက်သွန်နီ တန်ချိန် (၂၀၀) ကို ဘင်္ဂလားဒေ့ချ် ဝယ်ယူမည်
မြန်မာနိုင်ငံမှ ကြက်သွန်နီတန်ချိန် (၂၀၀) ကို ဝယ်ယူ တင်သွင်းရန်အတွက် ခွင့်ပြုပေးလိုက်ကြောင်း ဘင်္ဂလားဒေ့ရှ်နိုင်ငံ စိုက်ပျိုးရေးဝန်ကြီးဌာနမှ သိရသည်။ အစိုးရက တင်သွင်းခွင့်ပြုသည့် ကြက်သွန်နီ တန်ချိန် (၂၁,၅၈၀) အနက် မြန်မာနိုင်ငံက ခွဲတမ်းအဖြစ် တန်ချိန် (၂၀၀) တင်ပို့ခွင့် ရရှိခဲ့ခြင်း ဖြစ်သည်။
အိန္ဒိယနိုင်ငံဘက်မှ ကြက်သွန်နီ တင်ပို့မှုအပေါ် အခွန် (၄၀) ရာခိုင်နှုန်းအထိ တိုးမြှင့်ကောက်ခံမှုကြောင့် ပြည်တွင်းဈေးကွက်အတွင်း ကြက်သွန်နီဈေးနှုန်းများ မြင့်တက်လာခဲ့ပြီးနောက် ယခုကဲ့သို့ မြန်မာအပါအဝင် နိုင်ငံ (၉) နိုင်ငံမှ တင်သွင်းမည့် ဆုံးဖြတ်ချက် ထွက်ပေါ်ခဲ့သည်ဟု ဆိုသည်။
မြန်မာနိုင်ငံအနေဖြင့်လည်း ယခုဘဏ္ဍာနှစ်အတွင်း ပြည်ပနိုင်ငံများထံသို့ ကြက်သွန်နီတန်ချိန် (၁) သိန်းကျော်အထိ တိုးမြှင့် တင်ပို့နိုင်ရန် ရည်မှန်းထားသည်ဟု သိရှိရသည်။
ဘုရင့်နောင်ကုန်စည်ဒိုင်အတွင်း ကြက်သွန်နီဈေး တစ်ပိဿာလျှင် အမြင့်ဆုံး ကျပ် (၃,၅၀၀) အထိ ဈေးရနေပြီး ဇူလိုင်လဆန်း ဈေးနှုန်းထက် တစ်ပိဿာ ကျပ် (၁,၃၀၀) ကျော်အထိ မြင့်တက်လာခဲ့ခြင်း ဖြစ်သည်။
စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ စာရင်းများအရ ၂၀၂၂ ခုနှစ် ဧပြီလမှ ၂၀၂၃ ခုနှစ် ဖေဖော်ဝါရီလအထိ ပြည်ပဈေးကွက်သို့ ကြက်သွန်နီ တန်ချိန် (၉၄,၀၀၀) ခန့် တင်ပို့နိုင်ခဲ့ပြီး ၎င်းမှ အမေရိကန်ဒေါ်လာ (၄၁) သန်းကျော်ထိ ရရှိထားကြောင်း သိရသည်။
မြန်မာ့ကြက်သွန်နီကို အဓိက ဝယ်ယူနေသည့် ဖောက်သည်နိုင်ငံများထဲတွင် ထိုင်း၊ ဗီယက်နမ်၊ ဘင်္ဂလားဒေ့ရှ်၊ မလေးရှား၊ စင်ကာပူနှင့် အမေရိကန်နိုင်ငံများ ပါဝင်နေပြီး မြန်မာနိုင်ငံတစ်ဝှမ်း ကြက်သွန်စိုက်ဧက (၁၇၀,၀၀၀) ကျော်ရှိကာ ထုတ်လုပ်မှုတန်ချိန် (၁) သန်းခန့် ရှိသည်။
Source : Hwet Toe
