Myanmar
တန်ဆောင်မုန်းလပြည့်နေ့ရောက်တော့မယ်ဆိုတော့ မယ်ဇလီဖူးသုပ်လေး လုပ်ကြည့်ရအောင်
တန်ဆောင်မုန်းလပြည့်နေ့ရောက်တော့မယ်ဆိုတော့ ညီအစ်ကိုမောင်နှမတွေကို တန်ဆောင်မုန်းလပြည့်ည နက္ခတ်တွေစုံတဲ့အချိန်မှာ
မယ်ဇလီဖူးသုပ်လေးကို စားရင် ဆေးပေါင်းခတယ်လို့ လူကြီးတွေ ပြောစကားနဲ့အညီ အချိန်မီလေး သုပ်စားလို့ရအောင် မျှဝေပေးလိုက်ပါတယ်။
မယ်ဇလီဖူးသုပ်ဖို့အတွက် လိုအပ်တဲ့ပစ္စည်းတွေကတော့ မယ်ဇလီဖူး၊ ပုစွန်ခြောက်၊ မြေပဲ၊ နှမ်း၊ ကြက်သွန်နီ၊ ဆီ၊ နနွင်းမှုန့်၊ ဆား၊ ဟင်းခတ်မှုန့်အနည်းငယ်တို့လိုအပ်ပါမယ်။
ဈေးထဲမှဝယ်လာတဲ့ မယ်ဇလီဖူးကို သန့်စင်အောင် ရေနဲ့ ဆေးကြောပေးပါ။ ပြီးရင်တော့ မီးဖိုပေါ်မှာ အိုးတစ်လုံးတင်၊ ရေတစ်ဝက်သာသာလောက်ထည့်ပါမယ်။ ပြီးနောက် မယ်ဇလီဖူးတွေထည့်ပြီး ပြုတ်ပါ။
ပထမတစ်ရည် ပွက်ပွက်ဆူလာရင် အဲ့ဒီရေတွေကို သွန်ပစ်ပြီးတော့မှ နောက်တစ်ရေ ထပ်ထည့်ပြီး ထပ်တည်ပေးပါ။
သုံးကြိမ်မြောက်ရေလဲပြီးတဲ့အခါကျရင်တော့ မယ်ဇလီအဖူးတွေကို နူးအောင် ပြုတ်ပေးပါ။ (ခါးတာကြိုက်ရင်တော့ ၂ ကြိမ်မြောက်ရေလဲပြီးတဲ့အခါ နူးအောင်ပြုတ်လို့ရပါပြီ)
မယ်ဇလီဖူးပြုတ်ထားတဲ့အချိန်မှာ ကြက်သွန်နီကို အခွံနွှာ၊ အလုံးလိုက်ရေဆေး၊ ထက်ခြမ်းခြမ်း ပါးပါးလှီးပေးထားပါ။
ပြီးလျှင် မြေပဲနဲ့ နှမ်းကို လှော်ပေးထားပါ။ မယ်ဇလီဖူးပြုတ် ပြီဆိုရင်တော့ ရေတွေငှဲ့ပစ်ပြီး မယ်ဇလီဖူးတွေကို ဇကာနဲ့ ရေစစ်ပေးထားပါ။
ပြီးရင်တော့ မီးဖိုပေါ် ဒယ်အိုးတင်၊ ဆီထည့်၊ ဆီပူလာရင် နနွင်းမှုန့်လေးထည့်၊ ကြက်သွန်နီတွေထည့်ပြီး မီးအသင့်အတင့်နဲ့ ကြော်ပါ။
တဖြည်းဖြည်း မွှေနေရင်းနဲ့ ကြက်သွန်လေးတွေ ရွှေဝါရောင် ပြောင်းလာပြီဆိုရင် မီးဖိုပေါ်ကနေ ဒယ်အိုးချပြီး ကြက်သွန်နီဖတ်လေးတွေကို အမြန်ဆယ်ယူပါ။ ဆီကိုတော့ ဒယ်အိုးထဲမှာပဲ အအေးခံထားပါ။
ပြီးလျှင် ပုစွန်ခြောက်ကို မညက်တညက်ထောင်းပါ။ ၎င်းနောက် မြေပဲနဲ့ နှမ်းကိုလည်း မညက်တညက်လေးတွေ ဖြစ်အောင်ထောင်းပေးပါ။ မယ်ဇလီဖူးလေးတွေကိုလည်း ငရုတ်ဆုံထဲ ထည့်ပြီး ကြေသွားအောင် နည်းနည်းထောင်းလိုက်ပါ။ (ညက်စရာမလိုပါဘူး)
အားလုံးအသင့်ဖြစ်ပြီဆိုရင်တော့ ဇလုံတစ်လုံးထဲကို မယ်ဇလီဖူး၊ ပုစွန်ခြောက်မှုန့်၊ မြေပဲ၊ နှမ်း၊ ဆား၊ ဟင်းခတ်မှုန့်နဲ့ ကြက်သွန်နီဆီချက်တို့ကိုထည့်ပြီး အားလုံးသမအောင် ရောနယ်ပေးပါ။
ပြီးနောက် အပေါ့အငံမြည်းပြီး လိုအပ်တာကို ထပ်ဖြည့်ပါ။ အစပ်ကြိုက်တတ်ရင်တော့ ငရုတ်သီးစိမ်းလေးတွေပါ ပါးပါးလှီးထည့်ပြီး ရောသုပ်နိုင်ပါတယ်။
အဲ့ဒါဆိုရင်တော့ ဆေးပေါင်းခတဲ့ညမှာ စားသုံးနိုင်တဲ့ ခါးဆိမ့်သက် အရသာလေးနဲ့ မယ်ဇလီဖူးသုပ်လေး ရပါပြီ။
မယ်ဇလီဖူုးသုပ်လေးကို ရေနွေးကြမ်းလေးပဲဖြစ်ဖြစ်၊ မယ်ဇလီဟင်းခါးနဲ့ပဲဖြစ်ဖြစ် တွဲဖက်သုံးဆောင်ပါတယ်။
တန်ဆောင်မုန်းလပြည့်နေ့ည ၁၂ နာရီတိတိမှာ ပြည့်ဝန်းဝိုင်းစက်စွာ လင်းလက်နေတဲ့ လမင်းကြီးကို ကြည့်ပြီး မယ်ဇလီဖူးသုပ်ကို စားရင်း လိုချင်တဲ့ဆုလေးကိုလည်း တောင်းနိုင်ပါတယ်နော်။
အားလုံး ရွှင်လန်းချမ်းမြေ့ပါစေလို့ Myanmar Food Industrial Directory မှ ဆုမွန်ကောင်း တောင်းပေးလိုက်ပါတယ်။