Thiland

ယခုနှစ်တွင် ခန့်မှန်းခြေ ဆန်တန်ချိန် ၆ သန်း တင်ပို့နိုင်မည် ဖြစ်ပြီး နောက်နှစ်တွင် ဆန်တန်ချိန် ၇ ဒသမ ၅ သန်း တင်ပို့ရန် ထိုင်းနိုင်ငံက ရည်မှန်းထားသည်။ လုံလောက်သော ရေပေးဝေမှုနှင့် ဘတ်ငွေအားနည်းမှုကြောင့် ထိုင်းဆန်များ ပယှဉ်ပြိုင်နိုင်စွမ်း ပိုကောင်းနေသဖြင့် ယခုနှစ်ထက် ပမာဏ တိုးမြှင့်ရည်မှန်းလိုက်ခြင်း ဖြစ်သည်။

ကူးသန်းရောင်းဝယ်ရေး ဝန်ကြီးဌာနမှ အကြီးတန်းအရာရှိများနှင့် ဆွေးနွေးပြီးနောက် ထိုင်းဆန်တင်ပို့သူများအသင်း ဥက္ကဋ္ဌ Charoen Laothammatas က စိုက်ပျိုးရန် ရေအလျှံပယ် ရရှိခြင်းနှင့် ဘတ်ငွေတန်ဖိုးသည် ယခုအခါ ပျမ်းမျှ အမေရိကန်ဒေါ်လာ ၃၃ ဒေါ်လာသို့ ကျဆင်းသွားသည့်အတွက် လာမည့်နှစ်တွင် ဆန်တင်ပို့မှု အားကောင်းလာမည်ဟု မျှော်လင့်ကြောင်း ပြောကြားခဲ့သည်

ဘတ်ငွေ အားနည်းနေခြင်းကြောင့် ထိုင်းဆန်တင်ပို့မှု ဈေးနှုန်းများ ပိုမိုယှဉ်ပြိုင်နိုင်ခဲ့ပြီး ယခုအခါ ၅% ဆန်ဖြူသည် တစ်တန်လျှင် FOB ( free-on-board ) ဈေးနှုန်း ကန်ဒေါ်လာ ၃၉၀ ရောင်းဈေး ဖြစ်နေသဖြင့် ဗီယက်နမ် ဆန်ဈေးနှုန်း တစ်တန်လျှင် ကန်ဒေါ်လာ ၄၀၅ ထက် နိမ့်ကျနေသည်။

သို့သော်လည်း ကွန်တိန်နာပြတ်လပ်မှုနှင့် ပို့ဆောင်ရန် သင်္ဘောမှာ နေရာမရှိခြင်းတို့သည် ၂၀၂၂ ခုနှစ် ပထမနှစ်ဝက်အထိ ဆက်လက်တည်ရှိနေနိုင်ဖွယ်ရှိသည့် အဓိကပြဿနာများအဖြစ် ဆက်လက်ရှိနေဦးမည်ဟု Mr Charoen က ပြောကြားခဲ့သည်။

ထိုင်းနိုင်ငံသည် ယခုနှစ်ကုန်တွင် ဆန်တန်ချိန် ၆ ~ ၆ ဒသမ ၃ သန်း တင်ပို့နိုင်မည်ဟု မျှော်လင့်ထားပြီး ယမန်နှစ်က တင်ပို့ခဲ့သည့် တန်ချိန် ၅ ဒသမ ၇၂ သန်းထက် အနည်းငယ်သာ ပိုမိုတင်ပို့နိုင်မည်ဟု ၎င်းက ဆိုသည်။

၂၀၂၁ ခုနှစ်တွင် ထိုင်းနိုင်ငံသည် အိန္ဒိယနှင့် ဗီယက်နမ်တို့ပြီးလျှင် ကမ္ဘာ့တတိယအကြီးဆုံး ဆန်တင်ပို့သူအဖြစ် ဆက်ရှိနေရန် ခန့်မှန်းထားသည်။

ကမ္ဘာ့ဆန်တင်ပို့မှုဈေးကွက်တွင် ထိုင်းနိုင်ငံ၏ အဆင့်မြှင့်တင်ရန် ထိုင်းနိုင်ငံသည် ဆန်စပါးမျိုးကွဲများ ဖွံ့ဖြိုးတိုးတက်ရေးကို အရှိန်အဟုန်မြှင့်တင်ရန် လိုအပ်ကြောင်း Mr Charoen က ပြောကြားခဲ့သည်။

“ထိုင်းနိုင်ငံအနဖြင့် ဆန်မွှေးမျိုးကွဲအသစ်တွေကို ဖော်ထုတ်ပြီး တခြားနိုင်ငံများမှ ထုတ်လုပ်သူတွေနဲ့ ယှဉ်ပြိုင်နိုင်ဖို့ အားတက်သရော မြှင့်တင်ဖို့ လိုပါတယ်" ဟု ၎င်းက အကြံပြုသည်။

ထိုင်းဆန်ထုတ်လုပ်မှုသည် ၂၀၂၁-၂၂ ရာသီတွင် ဆန်စပါးအထွက်တိုးရန် ခန့်မှန်းထားပြီး ၂၀၂၀-၂၁ ရာသီတွင် ဆန်တန်ချိန် ၁၇ သန်းမှ တန်ချိန် သန်း ၂၀ အထိ တိုးလာမည်ဟု ခန့်မှန်းထားသည်။

ထိုင်းနိုင်ငံ၏ စပါးထွက်ရှိမှုသည် ပျမ်းမျှအားဖြင့် တစ်ရိုင်လျှင် ၄၅၀ ကီလိုဂရမ်ရှိပြီး ဗီယက်နမ်၏ တစ်ရိုင်လျှင် ၉၀၀ ကီလိုဂရမ်နှင့် အိန္ဒိယမှ တစ်ရိုင်လျှင် ၈၀၀ ကီလိုဂရမ်ထက် သိသိသာသာ နိမ့်ကျသည်။
(၁ ရိုင်= ၀.၁၆ ဟက်တာ = ၀.၄ ဧက)

ထိုင်းဆန်တင်ပို့သူများအသင်း၏ ဂုဏ်ထူးဆောင်ဥက္ကဋ္ဌဖြစ်သူ Chookiat Ophaswongse က မကြာသေးမီက ပြောကြားရာတွင် ထိုင်းနိုင်ငံသည် စားသုံးသူများ ၀ယ်လိုသည့် ဆန်အမျိုးအစားများ တိုးချဲ့ ထုတ်လုပ်ရန် ပျက်ကွက်နေပါက ဆန်တင်ပို့မှု ပမာဏ တဖြည်းဖြည်း ကျဆင်းသွားဖွယ်ရှိကြောင်း ပြောကြားခဲ့ပါသည်။ အထွက်နှုန်းကောင်းဖို့ကို မေ့ထားလိုက်ပြီး စားသုံးသူများ ကြိုက်နှစ်သက်သည့် ဆန်အမျိုးအစားများကို အထွက်နှုန်း နည်းပါးလျှင်လည်း စိုက်ပျိုးထုတ်လုပ်သင့်ကြောင် သူက အကြံပြုသည်။

bangkokpost