Food & Health
အရက်နာကျခြင်းကို ကုစားပေးနိုင်တဲ့ ရေခဲချောင်း
အရက်ကို အလွန်အကျွံသောက်သုံးပြီးတဲ့ နောက်ပိုင်းမှာ ဖြစ်တတ်တဲ့ ရောဂါဝေဒနာတွေကို အရက်နာကျတယ်လို့ ခေါ်ပြီး အရက်နာကျခြင်းရဲ့ လက္ခဏာတွေကတော့
ကတုန်ကယင်ဖြစ်ခြင်း၊ ခေါင်းကိုက်ခြင်း၊ မူးဝေအော့အန်ခြင်း၊ အစားမစားချင်ခြင်းနဲ့ ရေငတ်ခြင်းတို့ပဲ ဖြစ်ပါတယ်။
အရက် ပမာဏ ဘယ်လောက် သောက်ရင် အရက်နာကျနိုင်တယ်ဆိုတာကို အတိအကျ မပြောနိုင်ပေမယ့် လူတဦးနဲ့ တဦး ခံနိုင်ရည်ချင်း မတူညီတာကြောင့် တချို့သောသူတွေမှာ အနည်းငယ် သောက်သုံးရုံလောက်နဲ့ အရက်နာကျခြင်းကို ခံစားရပါတယ်။ အရက်၊ ဘီယာတွေမှာ ပါဝင်တဲ့ အယ်လ်ကိုဟောဟာ ခန္ဓာကိုယ်တွင်းက ရေနဲ့ ဓာတ်ဆားတွေကို ဆုံးရှုံးစေတာကြောင့် အရက်နာကျခြင်း ဝေဒနာကို ခံစားရတာပဲဖြစ်ပါတယ်။
ဒီလိုမျိုး ခံစားရခက်တဲ့ အရက်နာကျတဲ့ ဝေဒနာကို ဖြေရှင်းပေးနိုင်ဖို့အတွက် တောင်ကိုရီးယားနိုင်ငံကတော့ အရက်နာကျသူတွေ စားသုံးသင့်တဲ့ ရေခဲချောင်းတမျိုးကို တီထွင်ဖန်တီး ပြုလုပ်ထားပါတယ်။ ရေခဲချောင်းဆိုတာ ကလေးလူကြီးမရွေး အကြိုက်တွေ့ကြတဲ့ သရေစာတမျိုး ဖြစ်တာကြောင့် ရေခဲချောင်းကို အခြေခံပြီး ထုတ်လုပ်ထားတာဖြစ်တယ်လို့ သိရပါတယ်။
“Gyeondyo Bar” လို့ခေါ်တဲ့ ဒီရေခဲချောင်းကိုတော့ တောင်ကိုရီးယားနိုင်ငံရဲ့ Convenience Store ဆိုင်တိုင်းမှာ ရရှိနိုင်မှာ ဖြစ်ပါတယ်။ လွန်ခဲ့တဲ့ နှစ်ပေါင်းများစွာကတည်းက အရက်နာကျခြင်းအတွက် ကုသရာမှာ အသုံးပြုတဲ့ သစ်သီးဝလံတွေနဲ့ ထုတ်လုပ်ထားတာဖြစ်ပြီး စပျစ်သီးခြောက်နဲ့ ဂရိတ်ဖရုသီး အရသာတွေနဲ့ ထုတ်လုပ်ထားတာပဲ ဖြစ်ပါတယ်။
အရက်နာကျခြင်းကို ကုသရာမှာ စပျစ်ရည်၊ စပျစ်သီးခြောက်နဲ့ ဂရိတ်ဖရုသီးတို့ကို အသုံးပြုခဲ့တာဟာ လွန်ခဲ့တဲ့ ၁၇ ရာစုလောက်ကတည်းက ဖြစ်ပြီး ဒီအသီးအနှံတွေဟာ အရက်သောက်သုံးခြင်းကြောင့်ဖြစ်တဲ့ ပြင်းပြင်းထန်ထန် ခေါင်းကိုက်ခြင်း ဝေဒနာတွေကိုပါ သက်သာစေနိုင်တယ်လို့ ၂၀၁၂ ခုနှစ် Neuroscience ဂျာနယ်မှာ ပါဝင်တဲ့ ဆောင်းပါးတခုမှာ ဖော်ပြခဲ့ဖူးပါတယ်။
အရက်နာကျတဲ့အခါ ဆေးဝါးတွေသောက်သုံးတာနဲ့ တခြားသော နည်းလမ်းတွေထက် အရက်နာကျခြင်းအတွက် အခုလိုဖန်တီးပြုလုပ်ထားတဲ့ ရေခဲချောင်းစားသုံးလိုက်ခြင်းက ပိုမိုမြန်ဆန်ထိရောက်တာကြောင့် တောင်ကိုရီးယားနိုင်ငံမှာတော့ လူကြိုက်များနေပါတယ်။
Credit: burma.irriwaddy