Fruits & Vegetables
ဖိလစ်ပိုင်နိုင်ငံက ဂျပန်နိုင်ငံသို့ ရုံးပတီသီးများ ပိုမိုတင်ပို့ရန် စီစဉ်လျှက်ရှိ
ဂျပန်နိုင်ငံက ထောက်ပံ့ပို့ဆောင်ရေးကွင်းဆက်ကို ထိခိုက်စေသည့် ပြည်ပနိုင်ငံများ နှင့် ခရီးသွားလာမှု
ပိတ်ပင်ကန့်သတ်မှုများကို တဖြည်းဖြည်း ချင်းဖြေလျော့ခဲ့ပြီးနောက် ဖိလစ်ပိုင်နိုင်ငံ Luzon ဒေသမှ စိုက်ပျိုးရေးလုပ်ငန်းဆောင်ရွက်သူ ၃၀၀ ခန့်သည် ၎င်းတို့ စိုက်ပျိုးထားသည့် ရုံးပတီသီး များကို ဂျပန်နိုင်ငံသို့ တင်ပို့ရန် ပြင်ဆင်နေကြသည်။
ဖိလစ်ပိုင်နိုင်ငံ၊ Tarlac ဒေသရှိ ကျေးရွာ ၁၄ ခုမှ စိုက်ပျိုးရေးသမားများသည် အမြတ်အစွန်းရရှိနိုင်သော ရုံးပတီသီးများကို နိုင်ငံမြောက်ပိုင်းရှိ မြို့တော်မနီလာသို့ ပို့ဆောင်ခဲ့ပြီး ဖိလစ်ပိုင် စိုက်ပျိုးရေးဝန်ကြီးဌာနက ပြောကြားခဲ့သည်။ စိုက်ပျိုးရေးသမား ၃၀၀ ခန့်က အဆိုပါ ရုံးပတီးများကို စိုက်ပျိုးခဲ့ကြပြီး Jelfarm Fresh Produce Enterprise က ဂျပန်နိုင်ငံသို့ တင်ပို့ရန် ဦးဆောင်ခဲ့ခြင်းဖြစ်သည်။
ဖိလစ်ပိုင်နိုင်ငံမှ ရုံးပတီသီးအကြီးအကျယ်တင်ပို့သည့် Jelfarm ကုမ္ပဏီသည် အရည်အသွေးမီသည့် ဟင်းသီးဟင်းရွက်များကို ၅ တန်အထိ တိုးမြှင့်စိုက်ပျိုးထုတ်လုပ်ကာ နေ့စဉ်တင်ပို့ရန်နှင့် ရာသီချိန်တွင် တစ်ရက်လျှင် ၁၃ တန်မှ ၁၅ တန်အထိ တင်ပို့နိုင်ရန် ပြင်ဆင်ထားသည်လို့ စိုက်ပျိုးရေးဦးစီးဌာနမှသိရသည်။ အဆိုပါ Jelfarm ကုမ္ပဏီသည် ၎င်း၏ ရုံးပတီသီးစိုက်ခင်းများကို ဟက်တာထောင်ချီခန့်အထိ ချဲ့ထွင်ကာ ပြည်ပသို့ တင်ပို့ နိုင်ရန် ဖိလစ်ပိုင်အစိုးရ၏ အကူအညီဖြင့် ဆောင်ရွက်နေခြင်းဖြစ်သည်။
ပြီးခဲ့သည့် သီတင်းပတ်အကုန်က တင်ပို့သည့် ရုံးပတီသီးများသည် ဂျပန်နိုင်ငံရှိ ဟင်းသီးဟင်းရွက်လိုအပ်ချက်များပြားသည့် တိုကျို၊ အိုဆာကာ၊ ကိုဘေးနှင့် နာဂိုယာစသည့် ဒေသများသို့ ဦးတည်တင်ပို့မည်ဖြစ်ပါသည်။ အတွင်း၌ စေးကပ်သောအရည်များပါရှိသည့် ကျွတ်ဆတ်သည့် ဟင်းသီးဟင်းရွက်များသည် ကျန်းမာရေးအတွက် များစွာအကျိုးရှိသည်ဟု ယူဆသည့်အတွက် ရုံးပတီသီးသည် ဂျပန်နိုင်ငံတွင် များစွာခေတ်စား နေသည်။
ကိုရိုနာကပ်ရောဂါပြန့်ပွားနေသော်လည်း ယခုကဲ့သို့ တင်ပို့နိုင်ခြင်းသည် ထူးခြားသည့် အောင်မြင်မှုတစ်ခုပင်ဖြစ်သည်။ ဖိလစ်ပိုင်နှင့် ဂျပန် နိုင်ငံတို့အကြား နှစ်ဦးနှစ်ဖက် အကျိုးရှိသည့် “win-win arrangement” ကို ဆောင်ရွက်နိုင်ခဲ့ခြင်းဖြစ်ပြီး ရုံးပတီသီး စိုက်ပျိုးသူများ အနေဖြင့် ဆန်စပါးစိုက်ပျိုးသည့် လယ်သမားများထက် ဝင်ငွေပိုမိုရရှိနေသည် ဟု ဖိလစ်ပိုင်နိုင်ငံ၊ စိုက်ပိုးရေးဝန်ကြီးဌာနမှ အတွင်းဝန် William Dar က သတင်းစာရှင်းလင်းပွဲတွင်ပြောကြားခဲ့သည်။
JelFarm မှပိုင်ရှင်တစ်ဦးဖြစ်သည့် Jeffrey Fernandez က ရုံးပတီစိုက်ပျိုးသူများကို ၇၅ ရက်အတွင်း တစ်ဟက်တာလျှင် ရုံးပတီသီး ၁ တန် ထွက်အောင် စိုက်ပျိုးကြရန်တိုက်တွန်းထားသည်။ ၎င်းတို့အနေဖြင့် တစ်ဟက်တာ စိုက်ပျိုးထုတ်လုပ်မှုမှ ပီဆို ၈၀,၀၀၀ (အမေရိကန် ဒေါ်လာ ၁,၆၅၀ ခန့်) မှ ပီဆို ၁၂၀,၀၀၀ (အမေရိကန်ဒေါ်လာ ၂,၄၇၅ ခန့်) အထိ ရရှိနိုင်ပြီး အထွက်နှုန်းများများ ထွက်ရှိပါက စိုက်ပျိုးရေး သမားများအတွက် ဝင်ငွေရမည့် နည်းလမ်းကောင်းတစ်ခုဖြစ်သည်ဟုဆိုသည်။
ဖိလစ်ပိုင်နိုင်ငံသည် ဂျပန်နိုင်ငံသို့ ဆယ်စုနှစ် အတော်တော် ကြာကြာခန့်ကတည်းက ရုံးပတီသီးများတင်ပို့ရောင်းချနေပြီး ပို့ကုန်တိုးမြှင့်တင်ပို့ခြင်းဖြင့် ရုံးပတီသီးစိုက်ပျိုးသူများ ပိုမိုဝင်ငွေရရှိရန် ကြိုးပမ်းနေသည့် နိုင်ငံဖြစ်သည်။
၁၉၉၇ ခုနှစ်တည်းက သွင်းကုန်တင်သွင်းမှု ဆောင်ရွက်ခဲ့သည့် ဂျပန်နိုင်ငံ၏ ရောင်းဝယ်ရေးကုမ္ပဏီတစ်ခုဖြစ်သော Watari Co., က ဖိလစ်ပိုင်မှ ရုံးပတီသီးများကို အဓိက ဝယ်ယူတင်သွင်းနေသည်ဟု သိရသည်။ ဗိုက်တာမင်များ၊ သတ္တုဓာတ်ဆားများနှင့် အမျှင်ဓာတ်များစွာ ကြွယ်ဝသည့် ရုံးပတီသီးသည် အာရှနိုင်ငံအတော်များများတွင် များစွာ ခေတ်စားသည့် သီးနှံတစ်မျိုးဖြစ်သည်။
By Myanmar Food Guide
