Food & Livestock
ကယားပြည်နယ်အတွင်း ၂၀၂၀ မိုးရာသီစိုက်ပျိုးစရိတ် ချေးငွေများ စတင်ထုတ်ချေးပေး
Moi.Gov
ကယားပြည်နယ်အတွင်းရှိ တောင်သူလယ်သမားများအား ယခုနှစ်မိုးရာသီစိုက်ပျိုးစရိတ် ချေးငွေများကို မေလ(၁၅) ရက်နေ့မှ စတင်၍ ထုတ်ချေးပေးလျက်ရှိကြောင်း သိရသည်။
အဆိုပါ မိုးရာသီစိုက်ပျိုးစရိတ်ချေးငွေများကို လွိုင်ကော်မြို့နယ်၊ မြန်မာ့လယ်ယာဖွံ့ဖြိုးရေး ဘဏ်ခွဲမှ မေလ ၁၈ ရက်နေ့အထိ တောင်သူ (၅၇)ဦးအား ထုတ်ချေးပေးခဲ့ပြီး စိုက်ပျိုးစရိတ်ချေးငွေများမှာ စပါး(၁)ဧကလျှင် ကျပ် ၁၅၀၀၀ဝိ/- နှင့် အခြားသီးနှံများအတွက် (၁) ဧကလျှင် ငွေကျပ် ၁၀၀၀၀ဝိ/- နှုန်းဖြင့် ချေးငွေများ ထုတ်ပေးလျက်ရှိပြီး ချေးငွေအတိုးနှုန်းမှာ တစ်နှစ်လျှင် ၅ ရာခိုင်နှုန်းသာ ကောက်ခံကြောင်း သိရသည်။
ယခင်နှစ်က မိုးရာသီစိုက်ပျိုးစရိတ်ချေးငွေများကို ကယားပြည်နယ်အတွင်းရှိ တောင်သူလယ်သမား (၅၉၇၂)ဦး၊ ဧကပေါင်း (၃၀၁၀၄)ဧကအတွက် ငွေကျပ် (၃၈၈၅.၂၀)သန်း ထုတ်ချေးပေးလျက်ခဲ့ရာ အတိုးနှုန်းမှာ တစ်နှစ်လျှင် ၈ ရာခိုင်နှုန်းဖြစ်ကြောင်းနှင့် ယခုနှစ်တွင် အတိုးနှုန်းများကို ၃ ရာခိုင်နှုန်း လျော့ချ၍ ၅ ရာခိုင်နှုန်းသာ ကောက်ခံသွားမည်ဖြစ်ကြောင်း၊ လွိုင်ကော်မြို့နယ် ၊ မြန်မာ့လယ်ယာ ဖွံ့ဖြိုးရေးဘဏ်ခွဲအနေဖြင့် ၂၀၂၀ မိုးရာသီစိုက်ပျိုးစရိတ်ချေးငွေများကို (၄၀၇၅.၂၅)သန်း ထုတ်ချေးရန် လျာထားခဲ့ပြီး ယခုကနဦး ခွင့်ပြုရန်ပုံငွေကျပ် (၄၀၇၅.၂၅)သန်းကို ချေးငွေများထုတ်ချေးပေးလျက် ရှိကြောင်း ၊ ယခုနှစ် ချေးငွေများကို မေလ (၁၅)ရက်နေ့မှ စတင်၍ ဇူလိုင်လအထိ ထုတ်ချေးပေးနိုင်ရန် စီစဉ်ဆောင်ရွက်ထားရှိကြောင်း လွိုင်ကော်မြို့နယ် ၊ မြန်မာ့လယ်ယာ ဖွံ့ဖြိုးရေးဘဏ်ခွဲ မန်နေဂျာ ဦးဇော်မင်းခိုင် ထံမှ သိရသည်။
ကယားပြည်နယ်အတွင်းရှိ တောင်သူလယ်သမားများ အနေဖြင့် စိုက်ပျိုးစရိတ်ချေးငွေများကို ပြန်လည် ပေးဆောင်ကြရာတွင် နှစ်စဉ်သီးနှံပေါ်ချိန်၌ ပုံမှန်လာရောက်ပေးဆပ်လျက်ရှိပြီး ကြွေးကျန်များလည်း မရှိကြောင်း သတင်းရရှိသည်။
Moi.Gov
