Food & Livestock
မြန်မာ့ပြောင်းများ တင်ပို့ရန် တရုတ်၊ ထိုင်း၊ ဗီယက်နမ်မှ ကုမ္ပဏီ (၇) ခုနှင့် ပူးပေါင်း ဆောင်ရွက်မည်
မြန်မာနိုင်ငံ ပြောင်းလုပ်ငန်းအသင်း (MCIA) နှင့် ထိုင်းနိုင်ငံ၊ တရုတ်နိုင်ငံ၊ ဗီယက်နမ်နိုင်ငံတို့မှ ကုမ္ပဏီများနှင့် ပြောင်းဝယ်ယူ ရောင်းချခြင်းဆိုင်ရာ နားလည်မှုစာချွန်လွှာ (MoU) ကို လက်မှတ်ရေးထိုးခဲ့ပြီး ဖြစ်ကြောင်း ပြည်တွင်းကုန်သွယ်မှုဌာနခွဲမှ သိရသည်။
အဆိုပါ လက်မှတ်ရေးထိုးခြင်း အခမ်းအနားကို ပြီးခဲ့သည့် ဒီဇင်ဘာလ (၁၂) ရက်၊ အင်္ဂါနေ့က နေပြည်တော်ရှိ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ မြန်မာကုန်သွယ်မှု မြှင့်တင်ရေးအဖွဲ့၊ အစည်းအဝေးခန်းမ၌ ကျင်းပ ပြုလုပ်ခဲ့ခြင်း ဖြစ်သည်။
မြန်မာကုန်သွယ်မှု မြှင့်တင်ရေးအဖွဲ့၊ ညွှန်ကြားရေးမှူးချုပ်က မြန်မာနိုင်ငံသည် စိုက်ပျိုးရေးကို အခြေခံသည့် နိုင်ငံဖြစ်ပြီး ကုန်သွယ်မှု မြှင့်တင်ရေးအတွက် ယခုကဲ့သို့ ပုဂ္ဂလိကလုပ်ငန်းအချင်းချင်း B to B စနစ်ဖြင့် တရုတ်၊ ထိုင်း၊ ဗီယက်နမ်နိုင်ငံများသို့ မြန်မာ့ပြောင်း တင်ပို့နိုင်ရန် မြန်မာနိုင်ငံ ပြောင်းလုပ်ငန်းအသင်းအနေဖြင့် ဦးဆောင် စုစည်း ဆောင်ရွက်နိုင်ခြင်းအတွက် ဝမ်းမြောက် ဂုဏ်ယူရကြောင်း ပြောသည်။
တရုတ်၊ ထိုင်း၊ ဗီယက်နမ်နိုင်ငံများအနေဖြင့် ပြောင်းဝယ်လိုအားများပြီး ယခုကဲ့သို့ ပူးပေါင်း ဆောင်ရွက်ခြင်းဖြင့် ဈေးကွက်တည်ငြိမ်မှုနှင့် ကုန်သွယ်မှုပမာဏ တိုးတက်လာမည် ဖြစ်ကာ အမှန်တကယ် အောင်မြင်ရေးအတွက် လုပ်ထုံးလုပ်နည်းများနှင့်အညီ စနစ်တကျ အကောင်အထည်ဖော်ကြရန်လည်း ပြောကြားခဲ့သည်။
Click Here > AM Trading
မြန်မာနိုင်ငံ ပြောင်းလုပ်ငန်းအသင်း ဥက္ကဋ္ဌ၏ ပြောဆိုချက်အရ မြန်မာနိုင်ငံတွင် ပြောင်းစိုက်ဧက (၂) သန်းကျော် ရှိပြီး တန်ချိန် (၃) သန်းကျော် ထွက်ရှိကာ ပြည်တွင်းသုံးစွဲမှုအနေဖြင့် တန်ချိန် (၁) သန်းခန့် ရှိပြီး နှစ်စဉ်ပြည်ပသို့ တန်ချိန် (၂) သန်းကျော် တင်ပို့လျက် ရှိကြောင်း သိရသည်။
တရုတ်၊ ထိုင်းနှင့် ဗီယက်နမ်နိုင်ငံများသို့ ယခုကဲ့သို့ ပြောင်းဝယ်ယူ ရောင်းချရေးဆိုင်ရာ နားလည်မှုစာချွန်လွှာ (MoU) လက်မှတ်ရေးထိုးနိုင်ခဲ့သည့်အတွက် နိုင်ငံတော်အတွက် နှစ်စဉ် အမေရိကန်ဒေါ်လာ သန်း (၆၀၀) ကျော် ဝင်ငွေရှာဖွေပေးနိုင်မည် ဖြစ်သည်ဟု ၎င်းက ဆိုသည်။
ထိုသို့ တင်ပို့နိုင်ခြင်းဖြင့် ပုံမှန်ဈေးကွက် ဖြစ်လာသကဲ့သို့ ပွင့်လင်းမြင်သာမှု ရှိပြီး လုပ်ငန်းရှင်များအတွက် နှစ်ဦးနှစ်ဘက် ကျေးဇူးရှိကြောင်း၊ နားလည်မှုစာချွန်လွှာကိုလည်း နှစ်ဘက် ကြိုတင် ပြင်ဆင်ကာ ဆောင်ရွက်သွားမည် ဖြစ်ကာ ရေရှည်တည်တံ့ ခိုင်မြဲအောင် လုပ်ဆောင်သွားမည် ဖြစ်ကြောင်း ပြောသည်။
အဆိုပါပွဲတွင် မြန်မာနိုင်ငံ ပြောင်းလုပ်ငန်းအသင်းများနှင့် ပြည်ပကုမ္ပဏီ (၇) ခုတို့က ပြောင်းဝယ်ယူ ရောင်းချရန် နားလည်မှု စာချွန်လွှာများကို လက်မှတ်ရေးထိုးခဲ့ကြပြီး တက်ရောက်လာသူများက အထွေထွေ ဆွေးနွေးခြင်းများကို ဆောင်ရွက်ခဲ့ကြသည်။
၂၀၂၄ ခုနှစ်တွင် ဖော်ဆောင်မည့် နို့နှင့် နို့ထွက်ပစ္စည်း ထုတ်လုပ်မှု အဆင့်မြှင့်တင်ရေး စီမံကိန်း
ထိုင်းနိုင်ငံ Khon Kaen University မှ အကောင်အထည်ဖော် ဆောင်ရွက်မည့် LMC Strengthening Dairy Innovation (SDI) Programme စီမံကိန်းကို လာမည့် ၂၀၂၄ ခုနှစ် ဇန်နဝါရီလမှ ဒီဇင်ဘာလအထိ ဆောင်ရွက်သွားမည် ဖြစ်ကြောင်း မြန်မာနိုင်ငံ နို့လုပ်ငန်းအသင်းမှ ထုတ်ပြန် ကြေညာထားသည်။
အဆိုပါ စီမံကိန်းကို လန်ချန်း - မဲခေါင် ပူးပေါင်းဆောင်ရွက်ရေး အထူးရန်ပုံငွေဖြင့် လုပ်ဆောင်သွားမည် ဖြစ်ကာ လန်ချန်း - မဲခေါင် မြစ်ဝှမ်းဒေသအတွင်းရှိ တရုတ်၊ ထိုင်း၊ မြန်မာ၊ လာအို၊ ဗီယက်နမ်၊ ကမ္ဘောဒီးယား နိုင်ငံများမှ နို့စားနွား မွေးမြူရေးနှင့် နို့နှင့် နို့ထွက်ပစ္စည်း ထုတ်လုပ်မှု လုပ်ငန်းများကို အဆင့်မြှင့်တင်ရေးအတွက် ဆောင်ရွက်သွားမည် ဖြစ်သည်။
စီမံကိန်းအရ…
- သက်ဆိုင်ရာ နိုင်ငံများမှ မွေးမြူရေးဆိုင်ရာ ကျွမ်းကျင်သူများ၊ နို့စားနွားမွေးမြူသူများ၊ နို့နှင့် နို့ထွက်ပစ္စည်း ထုတ်လုပ်သူများအား နည်းပညာသင်တန်းများ ပို့ချပေးခြင်း၊
- နည်းပညာဆိုင်ရာ အလုပ်ရုံ ဆွေးနွေးပွဲများ ကျင်းပခြင်း၊
- မဲခေါင် - လန်ချန်းဒေသတွင်း နိုင်ငံများအကြား နို့စားနွားမွေးမြူရေးနှင့်၊ နို့နှင့် နို့ထွက်ပစ္စည်း ထုတ်လုပ်ရေးဆိုင်ရာ ကွန်ယက် ဖွဲ့စည်းတည်ထောင်ခြင်း လုပ်ငန်းများကို ဆောင်ရွက်သွားမည် ဖြစ်ကြောင်း သိရသည်။
Click Here > Myanmar Ranpu
စီမံကိန်းအရ ဖွင့်လှစ်မည့် သင်တန်းများ၊ အလုပ်ရုံဆွေးနွေးပွဲများကို ၂၀၂၄ ခုနှစ်၊ မေလတွင် စတင်နိုင်ရန် ပြင်ဆင်ထားရှိပြီး အဆိုပါသင်တန်းများ၊ အလုပ်ရုံဆွေးနွေးပွဲများသို့ မြန်မာနိုင်ငံမှ သင်တန်းသားများ စေလွှတ်နိုင်ရေးအတွက် မြန်မာနိုင်ငံ မွေးမြူရေးလုပ်ငန်းအဖွဲ့ချုပ်၊ မြန်မာနိုင်ငံ နို့လုပ်ငန်းအသင်းတို့က သက်ဆိုင်ရာ အဖွဲ့အစည်းများသို့ ဆက်သွယ် ညှိနှိုင်း ဆောင်ရွက်လျက် ရှိသည်။
ထို့ကြောင့် စိတ်ပါဝင်စားသည့် နို့စားနွားမွေးမြူသူများ၊ နို့နှင့် နို့ထွက်ပစ္စည်း ထုတ်လုပ်သူများအနေဖြင့် သင်တန်းသွားရောက်နိုင်ရန် နိုင်ငံကူးလက်မှတ် အပါအဝင် အခြားလိုအပ်နိုင်သည့် စာရွက်စာတမ်းများကို ကြိုတင် ပြင်ဆင်ထားရန်လည်း အသိပေး ကြေညာထားသည်။
စီမံကိန်းမှ သင်တန်းသားများ ခေါ်ယူသည့်အခါ မြန်မာနိုင်ငံ နို့လုပ်ငန်းအသင်းမှ အချိန်နှင့် တပြေးညီ ထပ်မံ ထုတ်ပြန် ကြေညာပေးသွားမည် ဖြစ်ပြီး လျှောက်လွှာများကို စီမံကိန်းတာဝန်ရှိသူများက ပြန်လည်စီစစ်ကာ သင်တန်းတက်ရောက်ခွင့် ရရှိသူ များကို ရွေးချယ် ထုတ်ပြန်ပေးသွားမည် ဖြစ်ကြောင်း သိရသည်။
ပြည်တွင်းဈေးကွက် လိုအပ်ချက် ဖြည့်တင်းရန် မြန်မာနိုင်ငံမှ မတ်ပဲနှင့် ပဲစင်းငုံများကို အိန္ဒိယ ဝယ်ယူမည်
ယခုနှစ်တွင် အိန္ဒိယနိုင်ငံ၌ ပဲစင်းငုံနှင့် မတ်ပဲ အထွက်နည်းပြီး ၎င်းပဲနှစ်မျိုးစလုံး ဈေးနှုန်းမြင့်တက်နေသည့်အတွက် ပြည်ပမှ ပဲစင်းငုံနှင့် မတ်ပဲများကို တင်သွင်းပြီး ပြည်တွင်းဈေးကွက် လိုအပ်ချက်ကို ဖြည့်တင်းမည်ဟု သိရသည်။
အိန္ဒိယအစိုးရသည် ဈေးနှုန်းမြင့်တက်နေသည်ကို ထိန်းချုပ်ရန်နှင့် ပြည်တွင်းဈေးကွက်တွင် လုံလောက်စွာ ရရှိနိုင်စေရန် မြန်မာနိုင်ငံမှ ပဲစင်းငုံ တန်ချိန် (၄) သိန်းနှင့် မတ်ပဲ တန်ချိန် (၁) သန်းခန့် တင်သွင်းရန် စီစဉ်လျက် ရှိသည်။
ပဲစင်းငုံနှင့် မတ်ပဲဈေးနှုန်းများ မြင့်မားနေသဖြင့် အိန္ဒိယအစိုးရက မြန်မာနိုင်ငံမှ ပဲစင်းငုံနှင့် မတ်ပဲတန်ချိန် (၄) သိန်းကို ၂၀၂၄ ခုနှစ် ဖေဖော်ဝါရီလတွင် ပထမအသုတ် တင်သွင်းရန် အစီအစဉ် ရေးဆွဲထားသည်။
Click Here > Grand Winner
The Economic Times သတင်းအရ အိန္ဒိယအစိုးရသည် ရိတ်သိမ်းဆဲကာလတွင် ပဲစင်းငုံနှင့် မတ်ပဲတို့ကို ထပ်မံ တင်သွင်းရန် ဆုံးဖြတ်ခဲ့သည်။ ပြီးခဲ့သည့်နှစ်နှင့် နှိုင်းယှဉ်ပါက ယခုနှစ်တွင် ထုတ်လုပ်မှု နည်းပါးမည်ဟု ခန့်မှန်းထားကြောင်း သိရသည်။
ပဲစင်းငုံနှင့် မတ်ပဲ ဈေးနှုန်းများကို ထိန်းချုပ်ရန် ကြိုးပမ်းရာတွင် ရည်ရွယ်ချက်ရှိရှိဖြင့် လှောင်ထားပြီး ဈေးကစားကြခြင်းကို တားဆီးရန် အစိုးရက သိုလှောင်မှု ပမာဏကို ၂၀၂၃ ခုနှစ် ဇန်နဝါရီလမှစ၍ ဒီဇင်ဘာလကုန်အထိ အကန့်အသတ်ဖြင့်သာ ခွင့်ပြုထားသည်။
အိန္ဒိယနိုင်ငံတွင် ပဲစင်းငုံနှင့် မတ်ပဲနည်းတူ တခြားစိုက်ပျိုးရေးထုတ်ကုန်များ ဖြစ်သည့် ဂျုံ၊ ဆန်၊ ကြက်သွန်နီ ဈေးနှုန်းများလည်း မြင့်တက်နေကြောင်း သိရသည်။
Source : Economic Times
လာမည့်ရာသီတွင် မြန်မာ့ထောပတ်သီးကို ထိုင်းနှင့် အိန္ဒိယသို့ အဓိကထား တင်ပို့မည်
လာမည့် ထောပတ်သီးရာသီတွင် မြန်မာနိုင်ငံမှ ထောပတ်သီးများကို ဝယ်ယူရန် ထိုင်းနိုင်ငံမှ ကမ်းလှမ်းထားသည့်အတွက် တင်ပို့သွားမည် ဖြစ်ပြီး
ပြည်တွင်းဆန်စျေး မြင့်တက်မှုကြောင့် ပြည်ပသို့ ဆန်တင်ပို့မှု တန်ချိန် (၅) သိန်းခန့် လျော့ကျ
၂၀၂၃- ၂၀၂၄ ဘဏ္ဍာနှစ် ပြည်ပသို့ ဆန်တင်ပို့မှုသည် ပြီးခဲ့သည့်နှစ် ကာလတူနှင့် နှိုင်းယှဉ်ပါက တန်ချိန် (၅) သိန်းခန့် လျော့နည်းသွားပြီး ထိုသို့ တင်ပို့မှု လျော့နည်းရခြင်းသည် ပြည်တွင်းဆန်စျေး မြင့်တက်မှုကြောင့် ဖြစ်ကြောင်း မြန်မာနိုင်ငံဆန်စပါးအသင်းချုပ် ဥက္ကဋ္ဌ ဦးရဲမင်းအောင်က ပြောသည်။
ယခုဘဏ္ဍာနှစ် ဧပြီ၊ မေ၊ ဇွန်၊ ဇူလိုင်၊ သြဂုတ် (၅) လတာကာလအတွင်း ပြည်ပသို့ ဆန်တင်ပို့မှုသည် (၄) သိန်းခန့်သာ ရှိခဲ့ပြီး မြန်မာနိုင်ငံမှ ဆန်ကို ဥရောပနိုင်ငံများက အဓိကထား ဝယ်ယူကာ တရုတ်၊ ဖိလစ်ပိုင်နှင့် ဒေသတွင်း နိုင်ငံများသို့လည်း တင်ပို့လျက် ရှိကြောင်း သိရသည်။
၂၀၂၃ ခုနှစ် စက်တင်ဘာလအတွင်း ပင်လယ်ရေကြောင်းကုန်သွယ်မှုမှ ပြည်ပသို့ စုစုပေါင်း ဆန်တန်ချိန် (၄၉,၂၆၀) ကျော် တင်ပို့ခဲ့ပြီး…
- အာရှနိုင်ငံများသို့ ဆန်တန်ချိန် (၃၃,၄၉၀) ကျော်
- ဥရောပနိုင်ငံများသို့ ဆန်တန်ချိန် (၁၀,၁၉၀) ကျော်
- အာဖရိက နိုင်ငံများသို့ ဆန်တန်ချိန် (၅,၅၇၀) ကျော် တင်ပို့ခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ထုတ်ပြန်ထားသည်။
Click Here > T & D Power Tech
အာရှနိုင်ငံများအနက် အင်ဒိုနီးရှားနိုင်ငံသို့ ဆန်တန်ချိန် (၁၁,၇၇၀) ကျော်၊ မလေးရှားနိုင်ငံသို့ ဆန်တန်ချိန် (၁၁,၃၉၀) ကျော်၊ ဖိလစ်ပိုင်နိုင်ငံသို့ ဆန်တန်ချိန် (၉,၅၆၀) ကျော်၊ စင်ကာပူနိုင်ငံသို့ ဆန်တန်ချိန် (၄၀၆) ကျော်၊ ဟောင်ကောင်သို့ ဆန်တန်ချိန် (၂၃၀) ကျော်နှင့် ထိုင်ဝမ်သို့ ဆန်တန်ချိန် (၁၀၀) ကျော် တင်ပို့ခဲ့သည်။
ပြည်တွင်း အဓိကစားသုံးဆန်များ ဖြစ်သည့် ရွှေဘိုပေါ်ဆန်း၊ ဧရာဝတီပေါ်ဆန်းနှင့် ပေါ်ဆန်းအုပ်စုများ၊ ဧရာမင်း၊ ဧရာပဒေသာ၊ အညာသား၊ ပခန်းစသော ပြည်တွင်းစားဆန် အမျိုးအစားများအား ပြည်တွင်းဈေးကွက် အတွက်သာ ဦးစားပေး ဖြန့်ဖြူး ရောင်းချလျက် ရှိကြောင်း မြန်မာနိုင်ငံဆန်စပါးအသင်းချုပ်ထံမှ သိရသည်။
ဧည့်မထအုပ်စုဆန်များ၊ ကရင်မ၊ ထွန်းပု၊ ငစိန် စသော ဆန်များ၊ ပေါင်းဆန်များကိုသာ အဓိက ပြည်ပတင်ပို့လျက် ရှိပြီး ဆန်ပြည်ပတင်ပို့မှုကို ရပ်နားထားခြင်းမရှိဘဲ ပြည်ပတင်ပို့ရန် ဆန်စုဆောင်းမှု ၁၀၀ ရာခိုင်နှုန်း (Cargo Readiness 100%) ရှိသည့် ကုမ္ပဏီများကို (Pre Shipment Inspection) စိစစ်ပြီး ပို့ကုန်လိုင်စင် ထုတ်ပေးခြင်းကို ဆက်လက် ဆောင်ရွက်ပေးလျက် ရှိသည်ဟု ဆိုသည်။
ဖွဲနုဆီ ထုတ်လုပ်လိုသူများအတွက် ဆန်စပါးအသင်းချုပ်က ချေးငွေနှင့် နည်းပညာ ရရှိရန် ချိတ်ဆက် ဆောင်ရွက်ပေးမည်
မြန်မာနိုင်ငံ ဆန်စပါးအသင်းချုပ်က ဦးဆောင်၍ စပါးခွံမှ လျှပ်စစ်ထုတ်သည့် ပြန်လည်ပြည့်ဖြိုးမြဲ လျှပ်စစ်စွမ်းအင်ထုတ် စက်ရုံနှင့် ဖွဲနုမှ ဆီကြမ်းထုတ်လုပ်ရေး စက်ရုံ၊ ဖွဲနုဆီ သန့်စင်စက်ရုံများကို အကောင်အထည်ဖော် ဆောင်ရွက်သွားမည် ဖြစ်ကြောင်း သိရသည်။
လာမည့် ကော်ဖီထွက်ချိန်တွင် မြန်မာ့ကော်ဖီကို ရုရှား ဝယ်ယူ တင်သွင်းမည်
ရုရှားနိုင်ငံက မြန်မာနိုင်ငံမှ ထွက်ရှိသည့် ကော်ဖီကို ဝယ်ယူပြီး ကုန်သွယ်မှု လုပ်ဆောင်မည် ဖြစ်ကြောင်း မြန်မာနိုင်ငံ ကော်ဖီအသင်းမှ သိရသည်။
ပြည်ပသို့ ဆန်တင်ပို့မှု ယခင်နှစ်နှင့် နှိုင်းယှဉ်ပါက တန်ချိန် (၅) သိန်းခန့် လျော့နည်းနေ
၂၀၂၃- ၂၀၂၄ ဘဏ္ဍာနှစ်၊ ငါးလတာကာလအတွင်း ပြည်ပသို့ ဆန်တင်ပို့မှုသည် (၄) သိန်းခန့်သာ ရှိခဲ့ပြီး ပြီးခဲ့သည့် ဘဏ္ဍာနှစ်နှင့် နှိုင်းယှဉ်ပါက ဆန်တန်ချိန် (၅) သိန်းခန့် လျော့နည်းသွားကြောင်း မြန်မာနိုင်ငံ ဆန်စပါး အသင်းချုပ်ထံမှ သိရသည်။
“ ၂၀၂၃- ၂၀၂၄ ဘဏ္ဍာနှစ်မှာ ဧပြီ၊ မေ၊ ဇွန်၊ ဇူလိုင်၊ သြဂုတ် ငါးလ ပြီးသွားပြီ။ ဒီငါးလအတွင်းမှာ ပြည်ပတင်ပို့က တန်ချိန် လေးသိန်းနီးပါးလောက် ရှိတာပေါ့။ မနှစ်ကနဲ့ နှိုင်းယှဉ်ရင် တန်ချိန်ငါးသိန်းလောက် နည်းနေတယ်။” ဟု မြန်မာနိုင်ငံ ဆန်စပါးအသင်းချုပ်မှ တာဝန်ရှိသူတစ်ဦးက စံတော်ချိန်သို့ ပြောကြားချက်အရ သိရသည်။
ယခု စက်တင်ဘာအတွင်း ပြည်ပသို့ ဆန်တန်ချိန် တစ်သိန်းခန့် တင်ပို့ရန် စီစဉ်ထားပြီး နှစ်စဉ် ဆန်တန်ချိန် နှစ်သန်းနှင့် နှစ်သန်းကျော် တင်ပို့လျက် ရှိကာ ယခုဘဏ္ဍာနှစ်တွင်လည်း ဆန်တန်ချိန် နှစ်သန်းနှင့် နှစ်သန်းခွဲထိ တင်းပို့မည်ဟု ခန့်မှန်းထားသည်ဟု ဆိုသည်။
Click Here > Green Leaf
ပြည်တွင်း အဓိကစားသုံးဆန်များ ဖြစ်သည့် ရွှေဘိုပေါ်ဆန်း၊ ဧရာဝတီပေါ်ဆန်းနှင့် ပေါ်ဆန်းအုပ်စုများ၊ ဧရာမင်း၊ ဧရာပဒေသာ၊ အညာသား၊ ပခန်းစသော ပြည်တွင်းစားဆန် အမျိုးအစားများအား ပြည်တွင်းဈေးကွက် အတွက်သာ ဦးစားပေး ဖြန့်ဖြူး ရောင်းချလျက် ရှိကြောင်း မြန်မာနိုင်ငံဆန်စပါးအသင်းချုပ်ထံမှ သိရသည်။
ဧည့်မထအုပ်စုဆန်များ၊ ကရင်မ၊ ထွန်းပု၊ ငစိန် စသော ဆန်များ၊ ပေါင်းဆန်များကိုသာ အဓိက ပြည်ပတင်ပို့လျက် ရှိပြီး ဆန်ပြည်ပတင်ပို့မှုကို ရပ်နားထားခြင်းမရှိဘဲ ပြည်ပတင်ပို့ရန် ဆန်စုဆောင်းမှု ၁၀၀ ရာခိုင်နှုန်း (Cargo Readiness 100%) ရှိသည့် ကုမ္ပဏီများကို (Pre Shipment Inspection) စိစစ်ပြီး ပို့ကုန်လိုင်စင် ထုတ်ပေးခြင်းကို ဆက်လက် ဆောင်ရွက်ပေးလျက် ရှိသည်ဟု ဆိုသည်။
မြန်မာနိုင်ငံမှ ဆန်တင်ပို့မှု အများဆုံးနိုင်ငံများမှာ ဥရောပနိုင်ငံများ ဖြစ်ပြီး တရုတ်နိုင်ငံအား ဒုတိယအများဆုံး တင်ပို့ကာ ဖိလစ်ပိုင်နှင့် ဒေသတွင်းနိုင်ငံများသို့လည်း တင်ပို့လျက် ရှိသည်။
တနင်္သာရီတိုင်းတွင် ဆီအုန်းစိုက်ဧက (၄) သိန်းခန့် ရှိပြီး ဆီကြမ်းနှင့် ဆီချောစက်ရုံများ လိုအပ်နေ
တနင်္သာရီတိုင်းဒေသကြီးအတွင်း၌ လွန်ခဲ့သည့် နှစ် (၃၀) ကျော်ခန့်မှ ဆီအုန်းစိုက်ပျိုးမှု စတင်ခဲ့ပြီး ယခုအခါ ဆီအုန်းကုမ္ပဏီပေါင်း (၃၉) ခုဖြင့် ဆီအုန်းစိုက်ဧကပေါင်း (၃၉၅,၇၂၁) ဧက စိုက်ပျိုးထားကြောင်း တနင်္သာရီတိုင်းဒေသကြီး စိုက်ပျိုးရေးဦးစီးဌာနမှ သိရသည်။
ဆီအုန်း စိုက်ပျိုး အောင်မြင်နိုင်သည့် ရေ၊ မြေ စသည့် ရာသီဥတု အခြေအနေများကြောင့် တနင်္သာရီတိုင်းဒေသကြီးအတွင်းတွင် ပြည်တွင်းသာမက ပြည်ပကုမ္ပဏီများကပါ ဆီအုန်းစိုက်ပျိုးမှုအတွက် လာရောက် ရင်းနှီးမြှုပ်နှံ လုပ်ကိုင်ကြခြင်း ဖြစ်သည်။
“ ၂၀၂၃- ၂၀၂၄ ခုနှစ် ဧပြီလမှ သြဂုတ်လအထိ ကောက်ယူထားတဲ့ စာရင်းများအရဆိုရင် တနင်္သာရီတိုင်းဒေသကြီး အတွင်းမှာရှိတဲ့ ထားဝယ်ခရိုင်၊ မြိတ်ခရိုင်၊ ဘုတ်ပြင်းခရိုင်နှင့် ကော့သောင်းခရိုင် စတဲ့ ခရိုင် (၄) ခုမှာ ဆီအုန်းစိုက်ဧကပေါင်း (၃၉၅,၇၂၁) ဧက ရှိပါတယ်။ ဆီသီးခိုင် ခူးနိုင်တဲ့ဧက (၁၈၃,၃၂၁) ဧကရှိတယ်။ တစ်ဧကအထွက်နှုန်းကတော့ (၂.၇၄) တန် ထွက်ရှိပါတယ်။ စုစုပေါင်း ဆီသီးခိုင် ထွက်ရှိမှုကတော့ (၅၀၂,၈၂၅) တန် ထွက်ရှိပါတယ်။ ” ဟု တနင်္သာရီတိုင်း စိုက်ပျိုးရေးဦးစီးဌာနမှ တာဝန်ရှိသူ တစ်ဦးက ပြောကြားသည်။
တနင်္သာရီတိုင်းဒေသကြီးအတွင်း၌ ဆီအုန်းစိုက်ပျိုးသည့် ကုမ္ပဏီပေါင်း (၃၉) ခုနှင့် ပုဂ္ဂလိကခြံရှင် (၄၀) နီးပါးခန့် ရှိပြီး ထွက်ရှိလာသည့် ဆီသီးခိုင်အများစုကို ဘုတ်ပြင်းခရိုင်နှင့် ကော့သောင်းခရိုင်အတွင်းရှိ ဆီကြမ်းစက်များသို့ သွားရောက် ရောင်းချရသဖြင့် အလေအလွင့်များနှင့် ကုန်ကျမှုစရိတ်စက များပြားကြောင်းနှင့် ယခုလက်ရှိတွင် ဆီသီးခိုင်စျေးနှုန်းမှာ တစ်တန်လျှင် ငွေကျပ် (၃၃၀,၀၀၀) ခန့် ပေါက်စျေးရှိကြောင်း သိရသည်။
Ad > Myat Mi Ba
“ ကျွန်တော်တို့ခြံက ထွက်ရှိတဲ့ ဆီသီးခိုင်တွေကို တောင်ဒဂုံစက်ရုံမှာ သွားရောက် ရောင်းချနေရတယ်။ ဆီအုန်းစိုက်ပျိုးမှုက ယခုလက်ရှိမှာ တွက်ခြေကိုက်ပေမယ့် ထွက်ရှိလာတဲ့ ဆီသီးခိုင်တွေ သွားရောက် ရောင်းချရတာ ဝေးတော့ စရိတ်တွေကုန်ကျမှုနဲ့ အလေအလွင့်တွေ ရှိပါတယ်။
မြိတ်ခရိုင်အတွင်းမှာသာ ဆီကြမ်းနဲ့ ဆီချောစက်ရုံတွေသာ ရှိမယ်ဆိုရင်တော့ ကျွန်တော်တို့ ခြံရှင်တွေအတွက် ပိုပြီး အဆင်ပြေလာနိုင်သလို စိုက်ပျိုးသူတွေအနေနဲ့ ဆီသီးခိုင် အထွက်ကောင်းဖို့ ကြိုးစား ဆောင်ရွက်လာမယ်။ အလေအလွင့်မရှိ စက်ရုံများကို အချိန်တိုအတွင်း ပို့ဆောင်နိုင်ရင် စရိတ်စက သက်သာလာပြီး ဝင်ငွေများလည်း တိုးပွားလာနိုင်ပါတယ်။ ” ဟု မြိတ်မြို့နယ်အတွင်း ဆီအုန်းစိုက်ပျိုးလုပ်ကိုင်နေသူ တစ်ဦးက ပြောကြားသည်။
ဒေသခံတောင်သူများနှင့် ကုမ္ပဏီများမှ ဆီအုန်းစိုက်ပျိုးရေးလုပ်ငန်းကို ထိထိရောက်ရောက် စိုက်ပျိုး လုပ်ကိုင်ပါက ဆီအုန်း စတင်စိုက်ပျိုးသည့် အချိန်မှ (၅) နှစ်ခန့် ကြာလာသည့်အခါတွင် စီးပွားဖြစ် ဆွတ်ခူးနိုင်မည် ဖြစ်သည်။
နောက်ထပ် (၃) နှစ်လောက် ကာလအကြာတွင် အရင်းကြေကာလတစ်ခုကို ရောက်ရှိလာသည့်အပြင် နောက်ထပ် နှစ်ပေါင်း (၂၀) ကျော် ကြာသည့်အထိ ဆီသီးခိုင်များ ထုတ်လုပ်နိုင်မည် ဖြစ်၍ ဝင်ငွေများလည်း ပိုမိုရရှိသွားမည့် စိုက်ပျိုးရေးလုပ်ငန်းတစ်ခု ဖြစ်ကြောင်း သိရသည်။
တနင်္သာရီတိုင်းဒေသကြီးအတွင်းတွင် ဆီကြမ်းစက်ရုံများ တည်ရှိမှုမှာ ထားဝယ်ခရိုင်တွင် (၁) ခု၊ မြိတ်ခရိုင်တွင် (၁) ခု၊ ဘုတ်ပြင်းခရိုင်တွင် (၂) ခုနှင့် ကော့သောင်းခရိုင်တွင် (၂) ခု စုစုပေါင်း ဆီကြမ်းစက်ရုံ (၆) ခု ရှိကြောင်း စိုက်ပျိုးရေးဦးစီးဌာနမှ သိရသည်။
မြန်မာ့နိုင်ငံတွင် ဆီအုန်းစိုက်ပျိုး အောင်မြင် ဖြစ်ထွန်းမှုတွင် တနင်္သာရီတိုင်းဒေသကြီး တစ်ခုတည်းသာ ရှိသောကြောင့် မြိတ်ခရိုင်၌ ဆီကြမ်းစက်ရုံနှင့် ဆီချောစက်ရုံ၊ ကော့သောင်းခရိုင်၌ ဆီချောစက်ရုံများ ဖြစ်ပေါ်လာရန် ကုမ္ပဏီများနှင့် ဒေသခံ ဆီအုန်းစိုက်ပျိုးသူ ခြံရှင်များက မျှော်လင့်နေကြကြောင်း သိရသည်။
မြန်မာနှင့် ဖိလစ်ပိုင် စိုက်ပျိုးရေးဆိုင်ရာ ကဏ္ဍများအတွက် ပူးပေါင်း ဆောင်ရွက်မည်
ဖိလစ်ပိုင်နှင့် မြန်မာအကြား စိုက်ပျိုးရေးနှင့် အသေးစား၊ အငယ်စား၊ အလတ်စားလုပ်ငန်းများ ဖွံ့ဖြိုးတိုးတက်ရေးတွင် ပူးပေါင်း ဆောင်ရွက်ရန်အတွက် နားလည်မှုစာချွန်လွှာကို လက်မှတ်ရေးထိုးခဲ့ ကြကြောင်း ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် UMFCCI မှ သိရသည်။
နားလည်မှုစာချွန်လွှာအား ASEAN-BAC Philippines ဥက္ကဋ္ဌ Mr Joe Ma A Concepcion III နှင့် ASEAN BA Myanmar ဦးအေးဝင်းတို့က စက်တင်ဘာ (၅) ရက်တွင် အင်ဒိုနီးရှားနိုင်ငံ၊ ဂျကာတာမြို့၌ ကျင်းပသည့် အာဆီယံအဖွဲ့ဝင် နိုင်ငံများမှ စီးပွားရေးလုပ်ငန်းရှင် အများအပြား တက်ရောက်ခဲ့ကြသော ဖိလစ်ပိုင်-အင်ဒိုနီးရှား စားပွဲဝိုင်းဆွေးနွေးပွဲတွင် လက်မှတ်ရေးထိုးခဲ့ခြင်း ဖြစ်သည်။
Ad > MMM Car Sales Center
အဆိုပါ နားလည်မှုစာချွန်လွှာတွင် အသေးစား၊ အလတ်စားနှင့် အကြီးစား တောင်သူလယ်သမားများ၊ လုပ်ငန်းရှင်များနှင့် သက်ဆိုင်ရာ အဖွဲ့အစည်းများအကြား အလားအလာရှိသော
- စိုက်ပျိုးရေးကဏ္ဍ၊
- စိုက်ပျိုးရေးနည်းပညာ၊
- စားနပ်ရိက္ခာဖူလုံရေး၊
- စားနပ်ရိက္ခာ ဘေးအန္တရာယ် ကင်းရှင်းရေးနှင့်
- စိုက်ပျိုးရေးအခြေခံ စားနပ်ရိက္ခာ ထုတ်လုပ်ရေး၊
- စိုက်ပျိုးမွေးမြူရေးလုပ်ငန်းပုံစံများနှင့်
- တန်ဖိုးမြှင့် ထောက်ပံ့မှု ကွင်းဆက်များ ဖွံ့ဖြိုး တိုးတက်ရေးတို့အတွက် လေ့လာမှုများနှင့် လမ်းညွှန်မှုများ ပြုလုပ်ကြရန် ပါရှိသည်။
ထို့နောက် ကုန်သွယ်မှုနှင့် ရင်းနှီးမြှုပ်နှံမှု အခွင့်အလမ်းများ ဖွံ့ဖြိုးတိုးတက်စေရန်၊ နည်းပညာဖလှယ်ခြင်း၊ ဆန်နှင့် လယ်ယာထွက်ကုန်များ၊ ဝန်ဆောင်မှုကဏ္ဍများတွင် လိုအပ်သည့် စီးပွားရေးဆိုင်ရာ လိုအပ်ချက်များကို သတ်မှတ်ရန်လည်း ဖော်ပြထားသည်။
ယင်းပြင် ရာသီဥတု ပြောင်းလဲမှုကို ရင်ဆိုင် ဖြေရှင်းရာတွင် ထိရောက်သော မဟာဗျူဟာများကို မြှင့်တင်ရန်နှင့် မြန်မာနှင့် ဖိလစ်ပိုင်နိုင်ငံတို့အတွက် ရေရှည်တည်တံ့သော လယ်ယာစီးပွားရေး ပတ်ဝန်းကျင်ကို ရရှိရန်တို့ ပါဝင်ကြောင်း သိရသည်။
