Fruits & Vegetables
မာလဲနတ်တောင် ရေလှောင်တမံမှ ယခုနှစ် နွေသီးနှံစိုက်ဧက ၈၀၀ ကျော်အတွက် စိုက်ပျိုးရေများ ပေးဝေသွားမည်
မတ္တရာမြို့နယ်အတွင်းရှိ မာလဲနတ်တောင် ရေလှောင်တမံအား တောင်သူများအတွက် စိုက်ပျိုးရေ ပြည့်ဝစွာပေးဝေနိုင်ရန်
ပြုပြင်မှုများ ဆောင်ရွက်ပြီးဖြစ်၍ နွေသီးနှံစိုက်ဧက ၈၀၀ ကျော်အတွက် လာမည့် ဖေဖော်ဝါရီ ပထမပတ်မှစ၍ စိုက်ပျိုးရေများပေးဝေသွားမည်ဖြစ်ကြောင်း မန္တလေးတိုင်း ဒေသကြီး ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနမှ လက်ထောက်ညွှန်ကြားရေးမှူး ဦးစံမင်းထွန်းက ပြောသည်။
အဆိုပါ နွေသီးနှံစိုက်ဧကများအတွက် မာလဲနတ်တောင်ရေလှောင်တမံအတွင်း ရေလက်ကျန်ပမာဏမှာ ဧကပေ ၁၇၀၈၀၊ ရသေပမာဏမှာ ဧကပေ ၇၄၁၀၊ စိုက်ပျိုးရေအတွက် အသုံးပြုနိုင်သော ရေပမာဏမှာ ဧကပေ ၉၆၇၀ ဖြစ်ပြီး ယင်းရေလက်ကျန် ပမာဏပေါ်မူတည်၍ ယခုဘဏ္ဍာနှစ်တွင် စပါး ၇၆၅ ဧကနှင့် နှမ်း ဧက ၁၀၀ လျာထားပြီး စိုက်ပျိုးရေများ ပေးဝေသွားမည်ဖြစ်ကြောင်း၊ ထို့အတူ လာမည့် ၂၀၂၁-၂၀၂၂ ခုနှစ် မိုးစပါးစိုက်ပျိုးကြမည့် ပျိုးထောင်ရေအတွက်လည်း ချန်ထားပြီးဖြစ်ကြောင်း သိရသည်။
“တောင်သူတွေအတွက် စိုက်ပျိုးရေများ ပြည့်ဝစွာပေးနိုင်အောင် မာလဲနတ်တောင်ကို အဆင်မြှင့်တင်ပြုပြင်ခြင်းလုပ်ငန်းတွေ ဆောင်ရွက်ပြီးပါပြီ။ နောက်ဆို မိုးရွာသွန်းမှုပေါ်မူတည်ပြီးတော့ တောင်သူ တွေအတွက် စိုက်ပျိုးရေများကို ပြည့်ဝစွာပေးသွားမှာပါ။ ယခုနွေသီးနှံတွေအတွက်လည်း စိုက်ပျိုးရေ ပေးဝေသွားတော့မှာပါ။ တောင်သူတွေအနေနဲ့ကလည်း ရေကို စနစ်တကျနဲ့ ချွေတာသုံးစွဲကြဖို့ လိုပါတယ်။ ဒါမှ ရေတွေအလေအလွင့်မရှိပဲနဲ့ တောင်သူတွေ အဆင်ပြေစွာသုံးစွဲနိုင်ကြမှာပါ။ နွေ၊ မိုး ရာသီအလိုက် တောင်သူတွေအတွက် စိုက်ပျိုးရေများကို ပေးဝေသွားမှာပါ” ဟု ဦးစံမင်းထွန်းက ရှင်းပြသည်။
မာလဲနတ်တောင်ရေလှောင်တမံမှ ရေပေးဝေနိုင်မှုအတွက် စနစ်တကျ အဆင့်မြှင့်တင်ပြီးဖြစ်၍ ဆည်ရေသောက်ဧရိယာဧက ၆၅၀၀ အတွက် အပြည့်အဝပေးဝေနိုင်တော့မည်ဖြစ်ကြောင်း၊ အဆိုပါ စိုက် ပျိုးရေများကို မာလဲကျေးရွာ၊ နတ်တောင်ကျေးရွာ၊ လက်ပန်လှ၊ ဝါးရုံး ကုန်း၊ ရှောက်ပင်ရိုး၊ ခူလယ်၊ ကုက္ကို၊ စဉ့်ကူး(၂)၊ ငွေတောင်နှင့် မင်းရွာ စသည့်ကျေးရွာများတွင် ယခင်ကထက် ဆည်ရေအပြည့်အဝ ရရှိတော့မည်ဖြစ်ကြောင်း သိရသည်။
ထိုအတူ ဆည်တော်ကြီးဆည်မှလည်း ယခုနှစ်တွင် တောင်သူများ စိုက်ပျိုးမည့် နွေသီးနှံများဖြစ်သော နွေစပါး ၆၇၀၅၃ ဧကနှင့် နွေနှမ်း ၂၉၅ ဧကတို့အတွက် ရေပြည့်ဝစွာ ပေးဝေသွားမည်ဖြစ်ကြောင်း သိရ သည်။
MDN
