Myanmar
ပြောင်းဈေးများ အနည်းငယ်ကျနေ
တရုတ်နှင့် ထိုင်းနိုင်ငံမှ ဝယ်ယူမှုလျော့နည်းနေသည့်အတွက် ပြောင်းဈေးများ အနည်းငယ် ကျဆင်းနေသည်
ဟု ပွဲစား၊ ကုန်သည်၊ စက်ပိုင်များ မဟာကထိန်တော်အသင်း (မန္တလေးကုန်စည်ဒိုင်) မှ သိရသည်။
“ပြောင်းဈေးလေးနည်းနည်ကျတယ်။ ပြောင်းဈေးက မနှစ်က ဒီလို ကာလတိုအချိန်မှာ ၂ သောင်းခွဲ ၂ သောင်း ၇ ထောင်လောက်ရှိနေတာ။ ဒီနှစ်က ၂ သောင်း ၃ ထောင်ဘဲ ရှိတော့တယ်။ ယိုးဒယားဘက်က ၈ လပိုင်းမှာ သူတို့ဆီမှာလည်း ထွက်တဲ့ရာသီဆိုတော့ သူတို့ဘက်က အဝယ်ပိတ်ထားတာရယ် တရုတ်ကလည်း အဝယ်နည်းနေသေးလို့ပါ။ ပြောင်းကို ရေလမ်းနဲ့ တင်ပေးတာက ဖိလစ်ပိုင်၊ မလေးရှားတင်ပေးတယ်။ ဒါပေမယ့် ဘော်ဒါနယ်စပ်အနေနဲ့ သွားတာ ကတော့ ထိုင်းနဲ့တရုတ်ကို သွားပါတယ်။ ပြောင်းဈေးတွေကျတဲ့အတွက် တောင်သူတွေ အနေနဲ့ကတော့ အမြတ်နည်းသွားတာပေါ့။ ဒီဈေးနှုန်းက ရှုံးတဲ့ဈေးနှုန်းတော့ မဟုတ်ပေမယ့် ရသင့်ရထိုက်တဲ့ အကျိုးမြတ်မခံစားရတာပေါ့။ " ဟု မန္တလေးကုန်စည်ဒိုင် ဒုတိယဥက္ကဋ္ဌ ဦးချွန်က ပြောကြားခဲ့သည်။
ပြောင်းသီးနှံများကို ရှမ်းပြည်နယ်၊ ပခုက္ကူ၊ ရေစကြို၊ မြင်းခြံ၊ မြောင်၊ မြင်းမူဒေသများနှင့် ဧရာဝတီချင်းတွင်းမြစ် ကမ်းများအနီး စသည့်ဒေသများတွင် အများဆုံးစိုက်ပျိုးကြပြီး နိုင်ငံခြား ဝင်ငွေရှာဖွေပေးနိုင်သည့် သီးနှံအဖြစ် နှစ်စဉ် ပြည်ပသို့ တင်ပို့ရောင်းချနေရပါသည်။
By Myanmar Food Guide
